მოსიძემ აღნიშნა, რომ საზოგადოებრივ მაუწყებელში საკადრო წმენდა არ იგეგმება და დასძინა, რომ მათი მთავარი მიზანი არის ის, რომ "მოამბე" გახდეს ერთ-ერთი ყველაზე გავლენიანი საინფორმაციო სამსახური ქვეყანაში:

"ჩემთვის ძალიან საპასუხისმგებლო მისიის შესრულებას ვიწყებ, გიორგისგან ეს იყო ძალიან საინტერესო შემოთავაზება, მაგრამ მე ძალიან ბევრი დრო დამჭირდა იმისთვის, რომ მიმეღო საბოლოო გადაწყვეტილება. იყო რამდენიმე მიზეზი, რის გამოც დავთანხმდი ამ თანამდებობას - პირველი იყო ის, რომ მივიღე გარანტიები იმისა, რომ სარედაქციო პოლიტიკაში ჩარევა არ მოხდება საზოგადოებრივი მაუწყებლის ხელმძღვანელობის მხრიდან, მეორე არის ის, რომ მე ძალიან დიდიხანი ვმუშაობდი ნიუსებში, აქედან გამომდინარე ვიცი ნიუსის მუშაობის სპეციფიკა და იყო კიდევ მრავალი სხვა ფაქტორი, რის გამოც დავთანხმდი. ალბათ ყველას გაინტერესებთ იქნება თუ არა საკადრო წმენდა, ჩვენ არავითარ საკადრო წმენდას ამ ეტაპისთვის არ დავიწყებთ, ჩვენი პროგრამა მაქსიმუმი არის მზადება ახალი ეთერისათვის. პროგრამა მინიმუმი არის შიდა საკადრო ცვლილებები, თითოეული აქ მომუშავე ადამიანის ხელშეუხებლობის გარანტი იქნება მათი პროფესიონალიზმი. ჩვენ მიგვაჩნია, რომ სწორი მენეჯმენტის პირობებში, აქ არიან ისეთი კადრები, რომელთა ოპტიმალურად გამოყენება არის შესაძლებელი. ჩვენი ერთ-ერთი მთავარი მიზანი არის ის, რომ "მოამბე" იყოს ერთ-ერთი ყველაზე გავლენიანი საინფორმაციო სამსახური ქვეყანაში, ამისათვის გვჭირდება ორი რამ - ნდობის ამაღლება საზოგადოების მხრიდან და მეორე, ეს არის რეიტინგებში წამყვანი პოზიციების დაკავება", - განაცხადა სოფო მოსიძემ.