სამიტის დაწყებამდე გერმანიის კანცლერმა ანგელა მერკელმა ჟურნალისტების კითხვებს უპასუხა. მისი თქმით, ევროკავშირი ამჟამად კრიზისში იმყოფება, თუმცა გაერთიანებას შეუძლია იმის დამტკიცება, რომ ყველაფერის მოგვარება შეუძლია.
“ჩვენ კრიტიკულ მდგომარეობაში ვიმყოფებით. მაგრამ მოქმედებებით უნდა ვაჩვენოთ, რომ შეგვიძლია, ვიყოთ უკეთესები უსაფრთხოების, ტერორიზმის წინააღმდეგ ბრძოლის, ეკონომიკური ზრდისა და სხვა მნიშნელოვან საკითხებში. თუმცა, ერთი სამიტისგან ევროპის ყველა პრობლემის მოგვარება მოსალოდნელი არ არის" - განაცხადა გერმანიის კანცლერმა.
ბრატისლავაში ევროკავშირის არაფორმალური სამიტი დღს გაიხსნა, სადაც ევროკავშირის ქვეყნების ლიდერები პირველად დიდი ბრიტანეთის პრემიერ-მინისტრის გარეშე შეიკრიბებიან და “ბრექსითის” შემდეგ ევროკავშირის მომავალზე იმსჯელებენ. მანამდე კი, ქვეყნის პრემიერმა სადილზე ევროკავშირის მაღალჩინოსნებს დონალდ ტუსკს, ჟან კლოდ იუნკერს და მარტინ შულცს უმასპინძლა.
ევროკავშირის ლიდერები სავარაუდოდ, იმსჯელებენ ახალი თავდაცვითი კავშირის შექმნაზეც - ეს არის საფრანგეთის და გერმანიის წინადადება, რომლებიც ევროკავშირის წევრ სახელმწიფოებს შორის სამხედრო თანამშრომლობის გაძლიერებას უჭერენ მხარს
მასალის გამოყენების პირობები






