ღამის 12 საათიდან სირიაში ცეცხლის შეწყვეტის რეჟიმი ამოქმედდება

მსოფლიო - 13:15, 12 Sep, 2016

4776

დღეს, 12 სექტემბერს, ღამის 12 საათიდან, მუსლიმური დღესასწაულის ყურბან-ბაირამის დაწყებისას, სირიაში ცეცხლის შეწყვეტის რეჟიმი ამოქმედდება.
აშშ-სა და რუსეთს შორის მიღწეული შეთანხმებით, ცეცხლის შეწყვეტის ათდღიანი რეჟიმის შემდეგ, მხარეები სირიაში მოქმედი ჯიჰადისტური დაჯგუფებების წინააღმდეგ ერთობლივ საჰაერო ოპერაციებს დაიწყებენ.

სირიული მედიის ცნობით, აღნიშნულ გეგმას, რომელზეც ვაშინგტონი და მოსკოვი რამდენიმე თვე მუშაობდნენ, უერთდება სირიის პრეზიდენტი ბაშარ ასადი.უცნობია, შეუერთდებიან თუ არა ზავს მეამბოხეები.
გეგმის გამოქვეყნების შემდეგ ცნობილი გახდა, რომ სირიის მთავრობა და ე.წ. ზომიერი ოპოზიცია თანამშრომლობისთვის მზად არიან. თუმცა სირიაში მოქმედი უმსხვილესია ისლამისტური დაჯგუფება „აჰრარ აშ-შამი“ გეგმის შესრულებაზე უარს აცხადებს იმ მიზეზით, რომ სამშვიდობო ზავი სირიელი ხალხის მიზნებს არ შეესაბამება.

აქტივისტების ცნობით, სამშვიდობო ზავის დაწყებამდე სირიის არმია აჯანყებულების კონტროლირებად ტერიტორიებს აქტიურად ბომბავდა, რასაც 100-მდე ადამიანი ემსხვერპლა.

აშშ-მა და რუსეთმა სირიაში ცეცხლის შეწყვეტის გეგმაზე ორი დღის წინ შეთანხმდნენ.

მოლაპარაკები 12 საათი მიმდინარეობდა. მასში მონაწილეობას აშშ-სა და რუსეთის პირველი დიპლოამტები ჯონ კერი და სერგეი ლავროვი იღებდნენ.

მიღწეული შეთანხმებით, 12 სექტემბრიდან სირიის კონფლიქტში ჩართულმა ყველა მხარემ საბრძოლო მოქმედებები უნდა შეწყვიტოს. 7 დღის შემდეგ შეიქმნება სპეციალური ცენტრი,რომელიც განსაზღვრავს ტერორისტულ ორგანიზაციებსა და ე.წ. ზომიერ ოპოზიციას.

გარდა ამისა, სირიის მთავრობამ ქვეყნის გარკვეულ რაიონებზე ავიადარტყმების მიტანა უნდაშეწყვიტოს, ხოლო ოპოზიციამ ტერორისტულ დაჯგუფებებთან ურთიერთობაზე უარი უნდათქვას.