ბრიტანელმა მეცნიერებმა დაადგინეს, რომ ძილის დროს თავის ტვინი არჩევს ადამიანისთვის ყველაზე აუცილებელ ინფორმაციას და მას მეხსიერებაში დიდი ხნის განმავლობაში ინახავს.

ექსპერიმენტში, რომელიც სუონსის უნივერსიტეტის მეცნიერებმა ჩაატარეს 80 ტუდენტი იღებდა მონაწილეობას. ექსპერიმენტის დროს სტუდენტები, რომელთა მშობლიური ენა ინგლისურია, ვალიურ (უელსის მცხოვრებთა ენა) ენას სწავლობდნენ. სტუდენტები ადრე არასდროს ცხოვრობდნენ უელსში და არ უსწავლიათ ვალიური.

სტუდენტების ერთი ნაწილი ახალ სიტყვებს ძილის წინ სწავლობდა, ხოლო მეორე ნაწილი სწავლის შემდეგ რამდენიმე საათი ფხიზლად იყო.

როგორც აღმოჩნდა, ახალგაზრდები, რომლებიც სწავლის შემდეგ იძინებდნენ, მასალას უკეთ იმახსოვრებდნენ.

გარდა აღნიშნულისა, უკეთესი შედეგები ჰქონდათ იმ სტუდენტებს, რომლებიც ვალიური ენის შესწავლას მიზანდასახულად უდგებოდნენ.

"აქ მნიშვნელოვანია თავად ის ფაქტი, რომ თქვენი პირადი წარმოდგენები და შთაბეჭდილებები ეხმარება ტვინს ძილის დროს მხოლოდ თქვენთვის საჭირო ინფორმაცია დაამუშავოს და დაიმახსოვროს," - აცხადებს ექსპერიმენტის ხელმძღვანელი, პროფესორი მარკ ბლეგროუვი.

დიდი ხნის განმავლობაში ითვლებოდა, რომ ძილი გასული დღის მოგონებების კონსოლიდირებას უწყობდა ხელს, თუმცა ახლა მეცნიერები აცხდებენ, რომ მთავარი პრიორიტეტული შთაბეჭდილებებია.