რუსთაველის გამზირზე აქცია ,,არ გვინდა კადრები“ გაიმართა

საზოგადოება - 16:12, 04 May, 2013

652

აქციის მონაწილეები პირადი ცხოვრების ამსახველი ვიდეოკადრების გავრცელებასა და გარკვეული ჯგუფების მხრიდან საზოგადოების ამ კადრებით მანიპულირებას აპროტესტებდნენ.

,,გუშინ კიდევ ერთხელ გავრცელდა ვიდეოკადრები, რომელზეც აღბეჭდილია ჩვენი მოქალაქის პირადი ცხოვრების ამსახველი დეტალები, ამ შეკრების მიზეზი არის ის, რომ ჩვენთვის არის უცნობი, თუ რა შედეგი დადო გამოძიებამ სხვა მსგავს შემთხვევებთან დაკავშირებით.
ასევე უცნობია, რა ბედი ეწევა ამ კონკრეტულ გამოძიებას, რადგან ,,იდენტობის" არც ერთ საჩივარზე , არც ერთ საქმეზე გამოძიების დაწყებას, შსს მხრიდან არ ჰქონია შედეგი.
ამ აქციით მოვუწოდებთ შსს, რომ განახორციელონ მსგავს თემებზე გამოძიება და იყოს სენსიტიური იმ თემების მიმართ, რომელიც ეხება ადამიანის პირად ცხოვრებას,"-განუცხადა ,,ნიუპოსტს" ,,იდენტობა"ს იურისტმა ნინო ბოლქვაძემ.

მისივე თქმით, მათთვის დახმარების თხოვნით, დაზარალებულს არ მიუმართავს, თუკი ის მოითხოვს იურიდიულ დახმარებას მათგან და თუ გამოძეიბა არ იმუშავებს ეფექტურად,ბოლქვაძის განმარტებით , ერთადერთ გზად ევროსასამართლო რჩება.

,,ძალიან დიდი ხანია, რაც ფარული ჩანაწერები და ადამიანის პირადი ცხოვრების ამსახველი კადრები ხდება საზოგადოების მანიპულაციის მიზეზი, მსგავსი ჩანაწერები კონკრეტული ადამიანების ცხოვრებას ზიანს აყენებს, ამ აქციის მიზანი არის ის, რომ მოვუწოდოთ ხელისუფლებას ყველა მოქალაქესა და ოპოზიციას შეწყვიტონ ადამიანის ცხოვრებაში ჩარევა და პირადი ცხოვრების ამსახველი კადრებით მანიპულირება,"-განაცხადა ჯგუფ ,,იდენტობას" სათემოს ცენტრის დირექტორმა ანა რეხვიაშვილმა.

გუშინ, გაურკვევლ ინტერნეტ საიტზე რამდენიმე პიროვნების პირადი ცხოვრების ამსახველი ვიდეოკადრები გავრცელდა, შსს-ს ცნობით საქმეზე აღძრულია სისხლისსამართლის საქმე და მინისტრს გამოძიების მიმდინარეობა პირად კონტროლზე ჰყავს აყვანილი.