ბარაკ ობამამ ფილიპინების ლიდერთან ხანმოკლე შეხვედრა მაინც გამართა

მსოფლიო - 15:36, 08 Sep, 2016

1334

აშშ-ის პრეზიდენტმა ბარაკ ობამამ ფილიპინების ლიდერთან, როდრიგო დუტერტესთან ლაოსში სამხრეთ-აღმოსავლეთ აზიის ქვეყნების ასოციაციის სამიტზე ხანმოკლე შეხვედრა გამართა. მას შემდეგ გაიმართა, რაც ფილიპინების პრეზიდენტმა ბარაკ ობამა უცენზურო სიტყვით მოიხსენია და მას "ნაბიჭვარი" უწოდა.

ბარაკ ობამასა და როდრიგე დუტერტეს მოლაპარაკებების შინაარსის შესახებ ინფორმაცია არ ვრცელდება.

ორი დღის წინ, ფილიპინების პრეზიდენტმა, ბარაკ ობამა უცენზურო სიტყვით სამხრეთ-აღმოსავლეთ აზიის ქვეყნების ასოციაციის (“ასეანის”) სამიტზე გამგზავრებამდე მოიხსენია, სადაც ბარაკ ობამას უნდა შეხვედროდა.

ფილიპინების პრეზიდენტის გაღიზიანება ჟურნალისტის შეკითხვამ გამოიწვია. ჟურნალისტმა დუტერტეს ჰკითხა, როგორ აპირებდა ობამასთვის აეხსნა ფილიპინებზე ბოლო ორი თვის განმავლობაში ჩატარებული ანტინარკოტიკული ოპერაციების დროს ორი ათასზე მეტი ადამიანის მკვლელობა.

„მე სუვერენული ქვეყნის პრეზიდენტი ვარ, ჩვენ დიდი ხანია კოლონია აღარ ვართ. მე არ მყავს სხვა უფროსი, გარდა ფილიპინელი ხალხისა. საჭიროა პატივისცემის გამოვლენა. მე შენ დაგწყევლი ამ ფორუმზე, ნაბიჭვარო” – განაცხადა დუტერტემ.

აღნიშნულ განცხადებაზე ჟურნალისტებმა კომენტარების გაკეთება აშშ-ის პრეზიდენტ სთხოვეს. ობამამ მათ სიცილით უპასუხა და დუტერტეს "ჭკუამხიარული ბიჭი" უწოდა. ასევე დასძინა, რომ კონსტრუქციული დიალოგის იმედი აქვს, თუმცა ამერიკულმა მხარემ ბარაკ ობამას ფილიპინების პრეზიდენტთან შეხვედრა მაინც გააუქმა.

მოგვიანებით დუტერტემ ბოდიში მოიხადა და განაცხადა, რომ უცენზურო სიტყვა პირადად ბარაკ ობამას მიმართ არ იყო ნათქვამი.