სისხლის სამართლის საქმე 157-ე მუხლის პირველი ნაწილის საფუძველზე აღიძრა, რაც "საქართველოს მოქალაქეთა პირადი ან ოჯახური საიდუმლოს ხელყოფას" გულისხმობს .

"აღნიშნულ საკითხთან დაკავშირებით ქალაქ თბილისის მთავარი სამმართველოს ვაკე-საბურთალოს პოლიციის პირველ განყოფილებას განცხადებით არასამთავრობო ორგანიზაცია "იდენტობის" ხელმძღვანელმა ნინო ბოლქვაძემ მიმართა. სისხლის სამართლის საქმე სწორედ მისი განცხადების საფუძველზე აღიძრა. შს მინისტრი ადამიანის პირადი ცხოვრების ხელყოფის ფაქტს სასტიკად გმობს და გიორგი ფარესაშვლის საქმე პირად კონტროლზე აჰყავს", - ნათქვამია სამინისტროს განცხადებაში.

შეგახსენებთ, რომ სოციალურ ქსელში დაახლოებით ორი საათის წინ უკანონოდ მოპოვებული პირადი ცხოვრების ამსახველი ვიდეომასალა გავრცელდა, რომელიც ერთ-ერთ ვებ-გვერდზე იყო ატვირთული. ვიდეოს სათაურის მიხედვით, მასალაში უფლებადამცველი გიორგი ფარესაშვილი იყო გადაღებული, თუმცა, მოგვიანებით სააგენტო "პრაიმერის" ოფისში მისულმა გიორგი ფარესაშვილმა განაცხადა, რომ ვიდეომასალა ფაბრიკაციაა და არა რეალობა.

კადრების გავრცელებამ აღშფოთება გამოიწვია ინტერნეტმომხმარებელთა გარკვეულ ნაწილში. სოციალურად აქტიურმა მომხმარებლებმა ხვალ, 4 მაისს, 15.00 საათზე, ყოფილი პარლამენტის შენობის წინ შეკრება დაანონსეს სახელწოდებით "აღარ გვინდა კადრები!". "ფეისბუქის" იმ მომხმარებელთა რაოდენობა, რომლებიც "ფეისბუქზე" გამოხატავენ მზადყოფნას, შეკრებას შეუერთდნენ, თანდათან იზრდება.