გერმანიის კანცლერის ანგელა მერკელის განცხადებით, აშშ და რუსეთი რაც შეიძლება მალე უნდა შეთანხმდნენ ალეპოში ცეცხლის შეწყვეტის პირობებზე, სადაც მშვიდობიანი მოსახლეობა იღუპება და სამედიცინო დაწესებულებები იბომბება.

„მე შემიძლია იმედი გამოვთქვა, რომ აშშ და რუსეთი სირიის ქალაქ ალეპოში ცეცხლის შეწყვეტის პირობებზე მალე შეთანხმდებიან, რადგან იქ მშვიდობიანი მოსახლეობა იხოცება, იბომბება სამედიცინო პუნქტები. ეს ყველაფერი მიუღებელია“ - განაცხადა მერკელმა.

შეგახსენებთ, დღეს დილით, სირიაში მომუშავე მოხალისე ექიმებმა და მაშველებმა, ბაშარ ასადის არმია ქიმიური იარაღის გამოყენებაში კიდევ ერთხელ დაადანაშაულეს.

მათი თქმით ალეპოს გარეუბან სუკარიში სამთავრობო ძალებმა ტოქსიკური ქლორის ბომბები ჩამოყარეს, რის გამოც საავადმყოფოში 100 მეტი ადამიანი მოხვდა.

სირიის ხელისუფლება ავიაიერიშების დროს ქიმიური იარაღის გამოყენების ფაქტს უარყოფს, თუმცა აგვისტოში გაეროს ეგიდით ჩატარებულმა გამოძიებამ დაადასტურა, რომ სირიის სამთავრობო ჯარებმა, მინიმუმ ორჯერ უკვე გამოიყენეს მომწამვლელი გაზი 2014 და 2015 წლის განმავლობაში.

საერთაშორისო საზოგადოება იმედოვნებდა, რომ სირიაში ცეცხლის შეწყვეტის შესახებ შეთანხმებას აშშ და რუსეთი G20-ის ფარგლებში, ბარაკ ობამასა და ვლადიმერ პუტინის შეხვედრის შემდეგ მიაღწევდნენ.

რუსეთის პრეზიდენტის განცხადებით, მოსკოვისა და ვაშინგტონის პოზიციები სირიის კრიზისის დარეგულირებასთან დაკავშირებით გარკვეულწილად დაახლოვდა, თუმცა საბოლოო გადაწყვეტილებაზე ვერ შეთანხმდნენ.