თურქეთის პრემიერის განცხადებით, უზბეკეთის პრეზიდენტი გარდაცვლილია

მსოფლიო - 18:20, 02 Sep, 2016

3721

თურქეთის პრემიერის ბინალი ილდირიმის განცხადებით, უზბეკეთის პრეზიდენტი ისლამ კარიმოვი გარდაცვლილია.
ამის შესახებ გამოცემა "როიტერსი" იტყობინება.
დილით გამოცემამ დაწერა, რომ სამი ოფიციალური წყარო კარიმოვის გარდაცვალებას ადასტურებდა. როგროც აღმოჩნდა, ერთ-ერთი მათგანი თურქეთის პრემიერია.
უზბეკეთის მთავრობა პრეზიდენტის გარდაცვალებას ამ დრომდე არ ადასტურებს.

გვიან ღამე, უზბეკეთის მინისტრთა კაბინეტმა ინფორმაცია გაავრცელა, რომ უზბეკეთის პრეზიდენტი ისლამ კარიმოვი კრიტიკულ მდგომარეობაში იმყოფება.

“დამძიმებული გულით გატყობინებთ, რომ გასული დღე-ღამის განმავლობაში ჩვენი პრეზიდენტის მდგომარეობა მკვეთრად გაუარესდა, ექიმები მის მდგომარეობას აფასებენ, როგორც კრიტიკული"- ნათქვამია მთავრობის განცხადებაში.

რამდენიმე დღის წინ რუსულ მედიაში გავრცელდა ინფორმაცია, რომ უზბეკეთის პრეზიდენტი 78 წლის ისლამ კარიმოვი გარდაიცვალა.

კარიმოვის შვილმა, ლოლა კარიმოვა-ტილიაევამ კი განაცხადა, რომ მამამისი ჰოსპიტალიზებულია და რეანიმაციულ განყოფილებაშია მოთავსებული. მისი თქმით, კარიმოვმა ინსულტი გადაიტანა.

ამასთან, საინფორმაციო სააგენტო "ფერგანა" იტყობინება, რომ უზბეკეთის პრეზიდენტის მშობლიურ ქალაქში, სამარკანდში დაკრძალვისთვის ემზადებიან. კერძოდ, ქალაქში გადაკეტილია ქუჩები, სამარკანდში კი მოულოდნელად უზებეკთის პრემიერ-მინისტრიც ჩავიდა.

კარიმოვის ჯანმრთელობის მდგომარეობის გაურესების გამო უზბეკეთში 31 აგვისტოს დაგეგმილი, ქვეყნის დამოუკიდებლობის გამოცხადების 25-ე წლისთავისადმი მიძღვნილი საზეიმო ღონისძიებები გაუქმდა.

ისლამ კარიმოვი უზბეკეთს 1989 წლიდან მართავს.