,,ერთ-ერთი ბიჭი ძირს ეგდო და რამდენიმე პოლიციელი ერთად ურტყამდა მას“

საზოგადოება - 13:48, 02 May, 2013

679

"ჩვენ ვმართავდით მშვიდობიან მანიფესტაციას პირველ მაისთან დაკავშირებით, რომლის მოთხოვნებიც იყო სოციალური სამართლიანობა და ღირსეული შრომის უფლების უზრუნველყოფა მოქალაქეებისთვის. საპატრულო პოლიციის ეკიპაჟი გამოჩნდა, როცა ჩამოვედით ვარაზის ხევით, გავიარეთ აღმაშენებლის გამზირი და აღმაშენებლის გამზირისკენ უკვე დიდი რაოდენობით პატრული აგვედევნა, ისინი პარალელურად მოგვიწოდებდნენ, რომ არ გადაგვეკეტა გზა, გადაკეტილი გვქონდა გზის სავალი ნაწილის ერთი მხარე, ჩვენ ავუხსენით პატრულს, რომ მათ არ ჰქონდათ ასეთი მოთხოვნის წამოყენების უფლება, ვინაიდან ჩვენ ვახორციელებდით მშვიდობიანი გამოხატვისა და მანიფესტაციის უფლებას, რომ ადამიანებს აქვთ კონსტიტუციით ამის უფლება, კონსტიტუცია არის საქართველოში ყველაზე მაღლა მდგომი ორგანული კანონი და ის უფრო მაღლა დგას, ვიდრე შეკრებისა და მანიფესტაციის შესახებ კანონი, რომელიც არ არის კონსტიტუციური და რომელიც უხეშად ლახავს ადამიანთა შეკრებისა და გამოხატვის უფლებას, ჩვენ ეს ავუხსენით პოლიციას და შესაბამისად, უარი ვუთხარით მათი მოთხოვნის დამორჩილებაზე.

რუსთაველის გამზირზე დაიწყეს დაკავება, მე რომ დავინახე, რომ იჭერდნენ ბავშვებს, თან ზოგიერთ მათგანს საშინელი ფორმით, ერთ-ერთი ბიჭი ძირს ეგდო, რამდენიმე პოლიციელი ერთად ურტყამდა მას. დაკავების დროს არ გვინმარტავდნენ, თუ რატომ გვაკავებდნენ და ბუნებრივია ეს იწვევდა აქციის მონაწილეების მხრიდან წინააღმდეგობის გრძნობას. ჩემთან ერთად დააკავეს ასევე არასრულწლოვანი, 14 წლის გოგონა და მეცხრე არხის ჟურნალისტი, მიუხედავად იმისა, რომ ჩვენს პროფესიას ვასახელებდით, ამაზე რეაქცია არ ჰქონიათ.

მე მივიჩნევ, რომ შეკრებისა და მანიფესტაციის კანონი, რომელიც ასეთი ძალადობის ლეგალურად განხორციელების საშუალებას აძლევს პოლიციას, არის დიდი საფრთხე ჩვენი ქვეყნის განვითარებისთვის, იმისთვის, რომ მოქალაქეებმა თავიანთი ბრძოლით, გამოსვლებით, მანიფესტაციებით შეძლონ თავიანთი უფლებების განხორციელება, დემოკრატიული საზოგადოების მშენებლობა, მიმაჩნია, რომ ეს კანონი უნდა შეიცვალოს, მაგრამ სანამ შეიცველება, პოლიციამ ეს არ უნდა გამოიყენოს იარაღად, სამართლებრივად თავისი უკანონო მოქმედებების გასამართლებლად", - აღნიშნავს ანი ჭანკოტაძე.