კიკაბიძე: ,,ჩვენ ჯერ კიდევ ნამგალის და უროს დროინდელი მენტალიტეტით ვაზროვნებთ“

საზოგადოება - 13:36, 02 May, 2013

903

მისი თქმით, როცა რუსეთთან ომის შემდეგ უსახლკაროდ დარჩენილ ხალხს ხედავს კრემლში სიმღერას ვერ შეძლებს.

,,ახლა მოსკოვიდან არიან ჩემთან ჟურნალისტები და მითხრეს, უკვე ხომ ყველაფერი კარგად არის, რუსეთში ქართულ ღვინოს და ბორჯომს ვღებულობთ და ჩამოდი რა, იმღერეო… ასე არ შეიძლება. ჩვენ ალბათ ჯერ კიდევ ნამგალის და უროს დროინდელი მენტალიტეტით ვაზროვნებთ, ავადსასხსენებელი საბჭოთა კავშირის დროინდელი მენტალიტეტით. სულ ვამბობ, გაიყვანეთ ტანკები და თუ ჩემი სიმღერა რამეს ნიშნავს, ჩამოვალ და სიამოვნებით ვიმღერებ-მეთქი. რისთვის ახრჩობ ამ პატარა ქვეყანას?! – გაუშვი, და თუ რამე შეეშლება, თვითონ გამოასწოროს თავის შეცდომები. ახლა დავიწყეთ ამის გარკვევა, ვინ დაიწყო ომი და როგორ დაიწყო. როცა ვხედავ, აქ ნახევარი მილიონი ადამიანი უსახლკაროდ დატანტალებს, ამ დროს კრემლში მართლა ვერ გიმღერებ. მე ასეთი ბუნების კაცი ვარ და რა ვქნა?-ამბობს კიკაბიძე.
საქართველოში მიმდინარე მოვლენებზე კი მომღერალი არჩევს ანალიზი არ გააკეთოს, თუმცა როგორც კიკაბიძე მიიჩნევს, ნათელია, რომ ერი ორ ნაწილად გაიყო.

,,ვერაფრის ანალიზს ვერ ვაკეთებ. ერთ რამეს კი ვხედავ, დიდი ხანია ქართველები გაიყვნენ და ამაზე უარესი საშინელება არ არსებობს პატარა ქვეყნისთვის. ამიტომაც არსად დავდივარ, არსად ვჩანვარ და არც არავის ვესაუბრები დღევანდელ მოვლენებზე. ჩემი გადასაწყვეტი რომ ყოფილიყო პოლიტიკური საკითხები, გავიდოდი და ვიტყოდი, რომ ყველამ ერთმანეთს ხელი ჩავკიდოთ და ქართული მრავალჟამიერი ვიმღეროთ-მეთქი. ჯერჯერობით არ უნდათ ასე და რა ვქნა", -აცხადებს ბუბა კიკაბიძე.