15 წუთის წინ რუსთაველზე გამზირზე დემონსტრანტები პოლიციამ დააკავა. აქციის მონაწილეები ქუჩის სავალ ნაწილზე გადავიდნენ. პატრულის თანამშრომლებსა და აქციის მონაწილეებს შორის შეხლა-შემოხლა მოხდა. როგორც აქციის მონაწილეები ამბობენ, პოლიციელები შეურაცხყოფას აყენებდნენ დემონსტრანტებს.

როგორც ლიბერალის მთავარი რედაქტორი შორენა შავერდაშვილი საკუთარ ,,ფეისბუქ" გვერდზე წერს, სამართალდამცავებმა არ დაიჯერეს რომ ჭანკოტაძე ჟურნალისტი არის და დააკავეს.

,,დაკავებულია ლიბერალის ჟურნალისტი, ანი ჭანკოტაძე. ანიმ უთხრა პოლიციელებს, რომ ჟურნალისტი იყო, მაგრამ მაინც დაიჭირეს," - წერს შავერდაშვილი.

აქციის მონაწილეების თქმით, პოლიციელები აგინებდნენ დემონსტრანტებს. ერთ-ერთმა პოლიციელმა ხელი გაარტყა "ლიბერალის" ჟურნალისტს, თინა ყიფშიძეს. ასევე, სავარაუდოდ, დაკავებულია მეცხრე არხის ერთ-ერთი ჟურნალისტიც.

დაკავებულია 1 მაისის აქციის ყველა ორგანიზატორი - "ლაბორატორია 1918-ის" წევრები, ლევან ასაბიშვილი, მათე გაბიცინაშვილი, სანდრო ცაგარელი და სხვები.