როგორც საგამოძიებო სამსახურის პრესსამსახურის უფროსმა, ნათია სუხიაშვილმა დღევანდელ ბრიფინგზე განაცხადა, საგამოძიებო სამსახურის თანამშრომლებმა სასოფლო-სამეურნეო ბარათების კანონდარღვევით გამოყენების ფაქტები გამოავლინეს.

"მიუხედავად იმისა, რომ ვაუჩერში მითითებული იყო, დაუშვებელია სასოფლო სამეურნეო ბარათების მიღება ფულადი თანხის სანაცვლოდ, საგამოძიებო სამსახურის თანამშრომლებმა გამოავლინეს მისი კანონდარღვევით გამოყენების ფაქტები. კერძოდ, პროგრამის მონაწილე მეწარმეები თავიანთ სავაჭრო ობიექტებში გლეხებისგან თანხის სანაცვლოდ იბარებდნენ ვაუჩერებს რეალურზე ნაკლებ ფასად. აყალბებდნენ მონაცემებს, რითაც ადასტურებდნენ, თითქოს ფერმერს ვაუჩერში მითითებული შესაბამისი თანხის საქონელი და ინვენტარი მიჰყიდეს. ამის შემდეგ, ვაუჩერის ბანკში წარდგენით იღებდნენ ბარათში დაფიქსირებულ სრულ თანხას. ამ კანონსაწინააღმდეგო ქმედებით, პროგრამის მონაწილე მეწარმეებმა თაღლითური გზით მიითვისეს პროგრამის ფარგლებში გამოყოფილი თანხის ნაწილი. გამოძიება მიმდინარეობს საქართველოს სისხლის სამართლის კოდექსის 180-ე მუხლის მესამე ნაწილით, რაც სასჯელის ფორმად ითვალისწინებს თავისუფლების აღკვეთას 6-დან 9 წლამდე.

ასევე, გამოძიება სწავლობს სოფლის მეურნბეობის სამინისტროს იმ თანამდებობის პირთა საკითხს, რომლებსაც ევალებოდათ აღნიშნული პროგრამის ფარგლებში გამოყოფილი თანხის მიზნობრივად ხარჯვაზე კონტროლი.", - განაცხადა ნათია სუხიაშვილმა.

აღნიშნული საქმის გამოძიება გრძელდება და არ არის გამორიცხული, რომ კიდევ გამოიკვეთოს სხვა მეწარმეების კანონსაწინააღმდეგო ქმედება.