პუტინი უკრაინას ემუქრება და დასავლეთს ოფიციალურ კიევზე ზეწოლისკენ მოუწოდებს

მსოფლიო - 20:51, 10 Aug, 2016

11087

რუსეთის პრეზიდენტის ვლადიმერ პუტინის განცხადებით, ყირიმში ორი რუსი სამხედროს მკვლელობას, ის ყურადღების გარეშე არ დატოვებს. რუსეთის უშიშროების ფედერალური სამსახურის მტკიცებით ორი რუსი სამხედრო უკრაინის სპეცსამსახურებმა მოკლეს.

„როგორც ჩანს, ის ადამიანები, რომელთაც კიევში ხელისუფლება აქვთ ხელში ჩაგდებული, იმის ნაცვლად, რომ მშვიდობიანი დარეგულირების საშუალებებს ეძებდნენ, ტერორზე გადავიდნენ“- განაცხადა ვლადიმერ პუტინმა. მისი თქმით ამ ინციდენტის შემდეგ „ნორმანდიულ ფორმატში“ გამართული შეხვედრებიც აზრს კარგავს.

რუსეთის პრეზიდენტის განცხადებით თუ აშშ და ევროპა, რომელთა მხარდაჭერითაც კიევი სარგებლობს, კონფლიქტის მშვიდობიანი მოგვარებით არიან დაინტერესებულნი, მათ უკრაინის ხელისუფლებაზე ზეწოლა უნდა განახორციელონ.

ოთხშაბათს, რუსეთის უშიშროების ფედერალური სამსახურმა განაცხადა, რომ მათ ყირიმის ტერიტორიაზე ტერორისტული აქტის მოწყობის მცდელობა აღკვეთეს. ტერაქტის მომზადებაში კი რუსეთის დაზვერვამ უკრაინის თავდაცვის სამინისტროს მთავარი სადაზვერვო სამსახური დაადანაშაულა.

უკრაინის სამხედრო დაზვერვის ოფიციალური წარმომადგენლმა წაყენებული ბრალდება უარყო და რუსეთის ФСБ-ს ინფორმაციას სიცრუე უწოდა.

უკრაინის უშიშროების სანჭოს მდივანმა ალექსანდრ ტურჩინოვმა კი რუსეთის ბრალდებები „პროვოკაციულ სისულელედ“ შეაფასა და განაცხადა, რომ რუსეთის განცხადებები ოკუპირებულ ტერიტორიებზე სიტუაციის ესკალაციას ისახავს მიზნად.