"არაერთხელ დაგიმტკიცებიათ ამ წლების განმავლობაში, რომ თქვენ თქვენი სიცოცხლის ფასად შეგიძლიათ დაიცვათ თქვენი სამშობლო. არ არსებობს ტყვია, რომელიც თქვენ გაგაჩერებთ, იმიტომ, რომ თქვენ ხართ საქართველოს შვილები და თქვენ ყოველთვის შეინახავთ იმ დიდი წინაპრების ღვაწლს, რომლებიც თქვენსავით იცავდნენ ჩვენს სამშობლოს. იყო ჯარისკაცი, მართლაც პატივია, მაგრამ სიცოცხლე გასწირო ბრძოლის ველზე, ეს არის ღირსეულთა ხვედრი", - განაცხადა ირაკლი ალასანიამ.

რუსთაველის თეატრში შეკრებილმა საზოგადოებამ წუთიერი დუმილით პატივი მიაგო დაღუპული გმირების ხსოვნას.

"დღეს შეიარაღებულ ძალებს გვაქვს დაბადების დღე. ჩვენ დილიდანვე დავიწყეთ ამ დღის აღნიშნვნა. დაახლოებით 152 სამხედრო მოსამსახურე დავაჯილდოვეთ გამორჩეული სამსახურისთვის, მე მეამაყება რომ დღეს ქვეყნის თავდაცვის მინისტრი ვარ, რომელსაც გამორჩეული შეიარაღებული ძალები ჰყავს.

მე მსურს აღვნიშნო იმ ჩვენი სამხედრო მოსამსახურეების დიდი წვლილი, რომლებიც დღეს ამ წუთებში, ავღანეთში ჩვენს პარტნიორებთან ერთად იცავენ საერთაშორისო უსაფრთხოებას და რეალურად ყველაზე მეტს აკეთებენ იმისთვის, რომ ჩვენ ძალიან მალე გავხდეთ ევროპული და ევროატლანტიკური ოჯახის წევრი. მე მსურს ქედი მოვიხარო და დიდი პატივისცემით აღვნიშნო ყველა სამხედრო მოსამსახურის წვლილი ჩვენი შეიარაღებული ძალების მშენებლობაში.

მე მსურს პატივისცემით გავიხსენო ყველა სამხედრო, გენერალი და მხედართმთავარი, რომელიც დღემდე საქართველოს ჰყოლია, მაგრამ ასევე მინდა აღვნიშნო, რომ ჩვენი ხელისუფლების მთავარი ამოცანა და ღირსების საქმეა, რომ არა მხოლოდ მოქმედი სამხედროები იყვნენ დაფასებულნი, არამედ ვეტერანებიც და განსაკუთრებით ისინი, რომლებმაც თავი შესწირეს ჩვენს ქვეყანას", - დასძინა ირაკლი ალასანიამ.

თავდაცვის მინისტრის თქმით, დღევანდელ ხელისუფლებას მნიშვნელოვანი გეგმები აქვს შეიარაღებული ძალების განსავითარებლად. ალასანიამ აღნიშნა, რომ მისთვის დიდი პატივია, იყოს ისეთი ქვეყნის თავდაცვის მინისტრი, რომელიც უახლოეს მომავალში ჩრდილოატლანტიკურ ალიანსში გაწევრიანდება.