ამის შესახებ გაზეთი "რეზონანსი" წერს. საპარლამენტო უმრავლესობის წევრი, გიორგი ვოლსკი ამ განცხადებას ავანტურისტულს უწოდებს და ამბობს, რომ ხელისუფლებას უარი კი არ განუცხადებია, არამედ პროექტის დაკონკრეტება მოითხოვა.

"გასაგებია, რომ პრეზიდენტმა "ლაზიკას" სახელი გაუტეხა, თუმცა მათ ძალიან კარგად იციან ჩემი ბრძოლა სააკაშვილთან. ჩვენ გადავწყვიტეთ, რომ ეს პროექტი წავიღოთ სომხეთში, აზერბაიჯანში, ასევე ერაყის მთავრობისგან არის ძალიან დიდი სურვილი. ალბათ სხვა ქვეყნებშიც გავაკეთებთ პრეზენტაციას, არ გამოვრიცხავთ, აფხაზეთშიც წავიღოთ", - აღნიშნა "რეზონანსთან" საუბრისას დავით კარტოზიამ.

პარლამენტის საგარეო ურთიერთობათა კომიტეტის წევრი, გიორგი ვოლსკი ამბობს, რომ მთავრობას კონფერენციის ჩატარებაზე უარი არ უთქვამს და ორგანიზატორებთან შეთანხმება მიღწეული იყო:

"ეს არის ავანტურისტული განცხადება, ე.ი. 250 მილიონი დოლარი მომაქვს და მთავრობა უარს მეუბნება. ეს არის აბსურდული რამ. ჩვენ თბილისში ვგეგმავდით საერთაშორისო კონფერენციას პოლიტიკურ თემებზე, საქართველო-კავკასიის უსაფრთხოების საკითხებზე.

დავით კარტოზიას ჰქონდა სურვილი, რომ თავისი პროექტი, რომელიც უკავშირდება ცნობილ "ლაზიკას" და ამბობს, რომ ეს არის პროექტი, რომელიც მას მოსტაცა სააკაშვილმა, წარედგინა კონფერენციაზე.

ლაზიკა და საერთოდ ნებისმიერი პროექტი, რომელიც მოითხოვს დიდ კაპიტალდაბანდებას, სანამ საერთაშორისო კონფერენციაზე გავა, უმჯობესია, პროფილურმა სამინისტროებმა განიხილონ", - აცხადებს გიორგი ვოლსკი.