დამოუკიდებელ აზერბაიჯანულ ტელეკომპანია - ANS-ს მაუწყებლობის ლიცენზია გაუუქმეს

მსოფლიო - 14:06, 29 Jul, 2016

1681

აზერბაიჯანის ტელე-რადიო მაუწყებლობის ნაციონალურმა საბჭომ ტელეკომპანია ANS-ს ლიცენზია გაუუქმა. მანამ, საბჭოს მოთხოვნით, სასამართლომ ტელეკომპანია ANS-ს მაუწყებლობა ერთი თვით შეუჩერა.

აღნიშნული მოთხოვნით, აზერბაიჯანის ტელე-რადიო მაუწყებლობის ეროვნულ საბჭოს აზერბაიჯანის გენერალურმა პროკურატურამ მიმართა. პროკურატურის განცხადებით, ტელეკომპანია ტერორიზმის ღია პროპაგანდასა და საბოტაჟს ეწეოდა, რაც აზერბაიჯან-თურქეთის სტრატეგიულ ურთიერთობას უქმნის საფრთხეს.
"სამწუხაროდ, ANS-მ დაიკავა პოზიცია, რომელიც რადიკალურად ეწინააღმდეგება აზერბაიჯანელი და თურქი ერების სტრატეგიული პარტნიორობისა და ძმობის ურთიერთობებს, აწარმოებდა პროპაგანდას, რომელიც მიმართული იყო თურქეთის სახელმწიფოსა წინააღმდეგ, მხარდაჭერა აღმოუჩინა ფეთჰულა გიულენსა და მის მომხრეებს, რომლებიც სისხლიანი მოვლენების ორგანიზატორები იყვნენ, რასაც მრავალი ადამიანი ემსხვერპლა”- ნათქვამია აზერბაიჯანის ტელე-რადიო მაუწყებლობის ნაციონალრი საბჭოს განცხადებაში.
ტელეკომპანია ANS-ი (Azerbaijan News Service) 1991 წლიდან მაუწყებლობს, ის აზერბაიჯანში პირველი დამოუკიდებელი ტელეარხი იყო.

15 ივლისის ღამეს, რამდენიმე საჯარისო დანაყოფმა თურქეთში სამხედრო გადატრიალების მოწყობა სცადა, რასაც 290 ადამიანი ემსხვერპლა, მათი უმრავლესობა თავად სამხედროა.

ამბოხის შემდეგ თურქეთში სულ დააკავეს ან სამსახურიდან გაათავისუფლეს 60 ათასამდე ადამიანი.

სამხედრო გადატრიალების მცდელობასთან დაკავშირებით დაკავებულია 15 ათასი ადამიანი, მათგან 10 ათასი სამხედრო.

ცნობილი გახდა, რომ თურქეთის ხელისუფლებამ ქვეყნის ერთ-ერთი უმსხვილესი გამოცემის, „ზამანის“ 47 თანამშრომლის დაკავების ორდერი გასცა. ამავდროულად 130 ადგილობრივი მედიასაშუალებების დახურვის გადაწყვეტილება მიიღო. საგარეო საქმეთა სამინისტროდან კი 88 თანამშრომელი, მათ შორის 2 ელჩი გაათავისუფლეს.

ანკარა პრეზიდენტ ერდოღანის ოპოზოციონერ , სასულიერი პირს ფეთჰულა გიულენს ამბოხის ორგანიზატორად ასახელებს და ვაშინგტონისგან მის ექსტრადირებას ითხოვს. თავად გიულენი კი სამხედრო გადატრიალების მცდელობასთან კავშირს უარყოფს.

ფეთჰულა გიულენი 1999 წლიდან პენსილვანიაში ცხოვრობს.