რუსეთი სირიის მთავრობასთან ერთად ალეპოში მასშტაბურ ჰუმანიტარულ ოპერაციას იწყებს

მსოფლიო - 15:27, 28 Jul, 2016

1630

რუსეთი სირიის მთავრობასთან ერთად, სირიის ქალაქ ალეპოში მასშტაბურ ჰუმანიტარულ ოპერაციას იწყებს. ამის შესახებ რუსეთის თავდაცვის მინისტრმა სერგეი შოიგუმ განაცხადა.
მისი თქმით, მშვიდობიანი მოსახლეობისთვის გაიხსნება სამი ჰუმანიტარული დერეფანი. ჰუმანიტარული დერეფნების გასწვრივ გაიხსნება ცხელი კვებისა და პირველადი სამედიცინო დახმარების პუნქტები.
კიდევ ერთი კორიდორი გაიხსნება იმ „ბოევიკებისთვის“, რომლებიც საბრძოლო მოქმედებებზე უარს იტყვიან და იარაღის დაყრას მოისურვებენ.

ბოლო 4 წელიწადია სირიის ქალაქი ალეპო ფაქტობრივად ორ ნაწილად არის გაყოფილი - ქალაქის დასავლურ ნაწილს სირიის არმია, აღმოსავლურს კი მისი მოწინააღმდეგეები აკონტროლებენ.

შეგახსენებთმ რუსეთმა სირიაში სამხედრო ოპერაცია გასული წლის 30 სექტემბერს დაიწყო. ვლადიმერ პუტინის თქმით, ოპერაცია "ისლამური სახელმწიფოს" წინააღმდეგ ბრძოლას ემსახურებოდა. თუმცა საერთაშორისო საზოგადოება მას ბაშარ ასადის მოწინააღმდეგე ოპოზიციის პოზიციების დაბომბვაში ადანაშაულებდა.

მარტის დასაწყისში კი, მოულოდნელად, ყოველგვარი წინაპირობის გარეშე, რუსეთის პრეზიდენტმა ვლადიმერ პუტინმა, თავდაცვის მინისტრ სერგეი შოიგუსთან და საგარეო საქმეთა მინისტრ სერგეი ლავროვთან შეხვედრაზე, სირიიდან რუსული საჯარისო ნაწილების ნაწილობრივ გამოყვანის შესახებ განკარგულება გასცა. მისი თქმით, რუსულმა არმიამ ყველა დასახული ამოცანა შეასრულა.