ამერიკული ანალიტიკური ინსტიტუტი (Atlantic Council) ახალ კვლევას - "შეიარაღება შეჩერებისთვის" აქვეყნებს, რომელშიც რუსეთის მხრიდან მომავალი საფრთხეების შესახებ წერს.

ანალიზის თანახმად, რუსეთისგან მომავალი საფრთხე უპირველესად ბალტიისპირა ქვეყნებსა და პოლონეთს ემუქრება.

"რუსეთის პრეზიდენტი, ვლადიმერ პუტინი, დასავლეთისისა და მისი ძირითადი ინსტიტუტების - ნატოსა და ევროკავშირის მიმართ თავის ნეგატიურ დამოკიდებულებას არ მალავს, რადგან დასავლური ღირებულებები, როგორიცაა დემოკრატია, პლურალიზმი, ადამიანის უფლებები, თავისუფლება, გამჭვირვალობა და კანონებ რუსეთის კლეპტოკრატიული რეჟიმისთვის საფრთხეს წარმოადგენს" - აღნიშნულია დოკუმენტში.

მკვლევარების თანახმად, რუსეთს ძველი გავლენის აღდგენა სურს და ამისთვის, პირდაპირ სამხედრო სამხედრო აგრესიას შეიძლება მოერიდოს, თუმცა ე.წ. ჰიბრიდული ომის წამოწყებისგან თავს არ შეიკავებს.

კვლევის ავტორების აზრით, რუსეთის შეჩერება მხოლოდ ძალის დემონსტრირებითა და მის წინააღმდეგ პრინციპული პოზიციის დაკავებით შეიძლება. ამის მაგალითად კი 2008 წლის ომი მოჰყავთ:

"როდესაც აშშ-მა შავი ზღვისკენ საბრძოლო გემები დაძრა და საქართველოს ლოჯისტიკურ საკითხებში დახმარება აღუთქვა, რუსულმა არმიამ თბილისისკენ სვლა შეაჩერა".

როგორც ანგარიშში ნათქვამია, რუსეთი ხვდება, რომ NATO-ს სამხედრო პოტენციალს კონკურენციას ვერ გაუწევს, თუმცა რეგიონში უპირატესი სამხედრო ბალანსის შესაქმნელად საკმარისი საბრძოლო რესურსი აქვს.

მკვლევარების თქმით, დასავლეთს არ ესმის რუსეთის, მათ ჰგონიათ, რომ მოსკოვი წესებს დაემორჩილება იმ შემთხვევაშიც კი, თუ მას არ ვაიძულებთ. NATO-ს ჰგონია, რომ საერთაშორისო ურთიერთობებისა და უსაფრთხოების კუთხით, რუსეთიც ალიანსის მსგავსი ლოგიკით მოქმედებს. თუმცა, კრემლის ლოგიკა ასეთია - იმოქმედოს ყოყმანის გარეშე და გაატაროს საკუთარი ინტერესები მაშინვე, როგორც კი ამის შესაძლებლობა იქნება".

ანალიტიკოსების თქმით, მართალია, ჯერჯერობით არ არსებობს იმის მოლოდინი, რომ რუსეთი NATO-ს პირდაპირ დაუპირისპირდება, მაგრამ ეს სიტუაცია შეიძლება მოულოდნელად, ერთ ღამეში შეიცვალოს და დიდი სისწრაფით, წინასწარ შემუშავებული გეგმის მიხედვით განხორციელდეს.