ევროკავშირი თურქეთში გამოცხადებული საგანგებო მდგომარეობის გამო შეშფოთებულია

მსოფლიო - 11:28, 22 Jul, 2016

2090

ევროკავშირი თურქეთში გამოცხადებული საგანგებო მდგომარეობის გამო შეშფოთებას გამოთქვამს. ამის შესახებ ევროკავშირის უმაღლესმა კომისარმა სამეზობლო პოლიტიკისა და საგარეო საკითხებში, ფედერიკა მოგერინიმ ვაშინგტონში ვიზიტის დროს განაცხადა.მისი თქმით, ევროკავშირი მხარს უჭერს თურქეთის დემოკრატიულ ინსტიტუტებს, თუმცა ზოგიერთი ქმედება მიუღებელია.

„ის, რასაც ვხედავთ მედიასთან, უნივერსიტეტებთან, მართლმსაჯულების ორგანოებთან მიმართებით, განსაკუთრებით მიუღებელია“- განაცხადა მოგერინიმ.

16 ივლისს, რამდენიმე საჯარისო დანაყოფმა თურქეთში სამხედრო გადატრიალების მოწყობა სცადა. ამბოხს 300-მდე ადამიანი ემსხვერპლა, მათ ორის უმრავლესობა თავად ამბოხის მონაწილეები არიან.

თურქეთში ამხედრო გადატრიალების მცდელობის შემდეგ , სამსახურიდან გაათავისუფლეს ან სამსახურეობრივი მოვალეობები შეუწყვიტეს 45 000 ადამიანს, მათგან 15 000 მასწავლებელი, ხოლო 1500 დეკანია.

თურქეთში, სახელმწიფო გადატრიალების მცდელობის შემდეგ 8 000-ზე მეტი სამართალდამცველი სამსახურიდან გაათავისუფლეს. სამსახურიდან გათავისუფლებულ პირებს შორის არიან პოლიციის 7899 ოფიცერი და ჟანდარმერიის 614 ოფიცერი. სამსახურეობრივი მოვალეობების შესრულება შეუწყდა 3 ათასს მოსამართლესაც.

ხელისუფლების განცხადებით, ყველა გათავისუფლებული და დაკავებული, ამერიკაში მცხოვრებ მუსლიმ სასულიერო პირს, ერდოღანის "პირად პტრად" გამოცხდებულ ფეთჰულა გიულენს უჭერს მხარს. ანკარა ფეთჰულა გიულენს ამბოხის ორგანიზატორად ასახელებს და ვაშინგტონისგან მის ექსტრადირებას ითხოვს. თავად გიულენი კი სამხედრო გადატრიალების მცდელობასთან კავშირს უარყოფს.

პრეზიდენტმა ერდოღანმა თურქეთში სამთვიანი საგანგებო მდგომარეობა გამოაცხადა. საგანგებო მდგომარეობის პერიოდში კი ადამიანის უფლებების ევროპული კონვენციის მოქმედების შეჩერება გადაწყვიტა.