"მიმდინარეობს საკონსტიტუციო სასამართლოს მოსამართლეების შანტაჟი"- გიორგი პაპუაშვილის საგანგებო განცხადება

პოზიცია - 15:17, 21 Jul, 2016

4345

საკონსტიტუციო სასამართლოს თავმჯდომარე გიორგი პაპუაშვილმა დღეს გამართულ ბრიფინგზე მოსამართლეებზე განხორციელებულ ზეწოლაზე, მუქარასა და შანტაჟზე ისაუბრა.

„ბოლო პერიოდის განმავლობაში მიმდინარეობს მიზანმიმართული ზეწოლა მოსამართლეებზე, რაც გამოიხატება მათზე თვალთვალში, მათ კომერციულ საქმეებზე ზეწოლაში დაშანტაჟებაში, რომ მათი ახლო ნათესავები დაკავებული იქნებიან სხვადასხვა საბაბით, აგრეთვე პირადი ინფორმაციის ხასიათის, ფალსიფიცირებული, მაგრამ ინფორმაცია შეიძლება გასაჯაროვდეს. ყველა ეს საქმე დაკავშირებულია მაღალი საზოგადოებრივი ინტერესის მქონე საქმეებთან, რომელიც განიხილება სასამართლოში და მიმართულია იმისაკენ, რომ მათ გადაწყვეტილება მიიღონ ან ხელისუფლების სასარგებლოდ ან მაქსიმალურად გააჭიანურონ გადაწყვეტილების მიღების პროცესი,“-აღნიშნა პაპუაშვილმა.

საკონსტიტუციო სასამართლოს თავმჯდომარემ კონკრეტულ მაგალითებზე საუბრისგან თავი შეიკავა. პაპუაშვილის განცხადებით, ზოგ შემთხვევაში, საქმე ეხება მოსამართლეების პირად ინფორმაციას.

"უნდა აღვკვეთოთ ეს საგანგაშო ფაქტები, რასაც ადგილი აქვს, რომ სასამართლოს შეეძლოს, ნორმალურ რეჟიმში გააგრძელოს თავისი საქმიანობა და გადაწყვეტილებები მიიღოს მხოლოდ კონსტიტუციის, კანონის და შინაგანი რწმენის საფუძველზე და არა ზეწოლისა და მუქარის საფუძველზე. ეს მნიშვნელოვანი საკითხია არამარტო სასამართლოს ფუნქციონირებისთვის, არამედ ქვეყნის დემოკრატიული განვითარებისთვის. მზად ვარ, უფრო დეტალურად ამ საკითხებზე ვისაუბრო ქვეყნის უმაღლესი თანამდებობის პირებთან" - აღნიშნა საკონსტიტუციო სასამართლოს თავმჯდომარემ.

გიორგი პაპუაშვილს კითხვა "რუსთავი 2" -ის საქმეზეც დაუსვეს. ჟურნალისტი დაინტერესდა უკავშირდება თუ არა ზეწოლის ფაქტები ტელეკომპანიის საქმეს, რაზეც პაპუაშვილმა კონკრეტული პასუხი არ გასცა.

"არ მინდა, რომელიმე კონკრეტული საქმე ვახსენო, რათა ისედაც დაძაბული ვითარება უფრო არ დაიძაბოს. თუმცა, რა თქმა უნდა, იმ პიროვნებებთან, ვისაც ეს ეხება, ამ საქმეებსაც და ფაქტებსაც უფრო დეტალურად განვიხილავ" - განაცხადა პაპუაშვილმა.

ცნობისთვის, საკონსტიტუციო სასამართლოში გიგი უგულავასა და რუსთავი ორთან დაკავშირებული საქმეები განიხილება.