ფეთჰულა გიულენის ინტერვიუს გაშვების გამო აზერბაიჯანში ტელეკომპანია ANS TV დაიხურა

მსოფლიო - 12:55, 19 Jul, 2016

4390

აზერბაიჯანში, ფეთჰულა გიულენის ინტერვიუს ეთერში გაშვების გეგმის გამო ტელეკომპანია ANS TV დაიხურა. როგორც "ბიბისი" იტყობინება, ამის შესახებ ინფორმაციას აზერბაიჯანული სააგენტო “ტრენდი” აქვეყნებს.

აღნიშნული მოთხოვნით, აზერბაიჯანის ტელე-რადიო მაუწყებლობის ეროვნულ საბჭოს აზერბაიჯანის გენერალურმა პროკურატურამ მიმართა. პროკურატურის განცხადებით, ტელეკომპანია ტერორიზმის ღია პროპაგანდასა და საბოტაჟს ეწეოდა, რაც აზერბაიჯან-თურქეთის სტრატეგიულ ურთიერთობას უქმნის საფრთხეს.

თურქეთის ხელისუფლება 16 ივლისის ამბოხის იდეოლოგად კი ამერიკაში მცხოვრებ თურქე სასულიერო პირს ფეთჰულა გიულენს მიიჩნევს. პრეზიდენტმა რეჯეპ ტაიპ ერდოღანმა აშშ-სგან გიულენის ექსტრადირება მოითხოვა. თუმცა, აშშ-ის სახელმწიფო მდივანმა ჯონ კერიმ განაცხადა, რომ ვაშინგტონს ამ დრომდე ანკარისგან ოფიციალური მოთოვნა არ მიუღია. მისი თქმით, გიულენის ექსტრადირებისთვის ანკარამ მტკიცებულებები უნდა წარადგინოს, შემდეგ კი მათი შესწავლა მოხდება და მხოლოდ ამის შემდეგ იქნება გადაწყვეტილება მიღებული.

ერდოღანს გიულენი თურქეთის მტრად ჰყავს გამოცხადებული. ფეთჰულა გიულენი 1999 წლიდან პენსილვანიაში ცხოვრობს.

თურქეთში, სახელმწიფო გადატრიალების მცდელობის შემდეგ 8 000-ზე მეტი სამართალდამცველი სამსახურიდან გაათავისუფლეს. სამსახურიდან გათავისუფლებულ პირებს შორის არიან პოლიციის 7899 ოფიცერი და ჟანდარმერიის 614 ოფიცერი. ამას გარდა, თანამდებობები დატოვეს რამდენიმე პროვინციის გუბერნატორებმა და ოლქების მმართველებმა.

თურქეთში ამბოხთან დაკავშირებით სულ 6000 ადამიანია დაკავებული. მათ შორის სამხედრო მაღალჩინოსნები, მოსამართლეები და პროკურორები.