გერმანიაში, მატარებლის მგზავრებზე თავდამსხმელის ოთახში ISIS-ის დროშა იპოვეს

მსოფლიო - 11:13, 19 Jul, 2016

5691

გერმანიაში, მატარებლის მგზავრებზე თავდამსხმელის, 17 წლის ავღანელი ბიჭის ოთახში რადიკალური ექსტრემისტული დაჯგუფება “ისლამური სახელმწიფოს” დროშა იპოვეს.

როგორც "ბიბისი" იტყობინება, ამის შესახებ ბავარიის შინაგან საქმეთა სამინისტროს ხელმძღვანელმა იოაჰიმ ჰერმანმა ადგილობრივი ტელევიზიისთვის მიცემულ ინტევრიუში განაცხადა.

“დიდია ალბათობით, ეს იყო ისლამისტების თავდასხმა” - განაცხადა ჰერმანმა.

მისივე თქმით, როგორც რამდენიმე თვითმხილველმა განაცხადა, თავდამსხმელი "ალაჰ აკბარს" სკანდირებდა.

შეგახსენებთ, გუშინ ღამე, გერმანიაში, ბავარიის ქალაქ ვიურცბურგთან ახლოს, ნაჯახით შეიარაღებული 17 წლის ბიჭი სამგზავრო მატარებელში შეიჭრა და მგზავრები დაჭრა. მატარებლის გაჩერების შემდეგ თავდამსხმელმა გაქცევა სცადა, თუმცა მას პოლიციამ ცეცხლი გაუხსნა და მოკლა.

თავდაპირველად , გავრცელდა ინფორმაცია 20 მგზავრის დაჭრის შესახებ. თუმცა, ბოლო მონაცემებით დაშავებულია ოთხი ადამიანი, მათ შორის ოჯახი ჩინეთიდან. ორი დაშავებულის მდგომარეობა კი კრიტიკულია.

როგორც გაირკვა ის ავღანელი იყო, რომელიც გერმანიაში ცოტა ხნის ჩავიდა და ქალაქ ოქსენფურტში ცხოვრობდა.