აშშ თურქეთს აფრთხილებს ეჭვმიტანილების დასჯის პროცესში დემოკრატიულ საზღვრებს არ გადააჭარბოს

მსოფლიო - 10:08, 19 Jul, 2016

4754

თეთრი სახლის ინფორმაციით, ოფიციალურ ანკარას შეერთებული შტატებისთვის ფატულა გიულენის ექსტრადიციის მოთხოვნა არ გაუგზავნია.

პრესმდივან ჯოშ ერნესტის განმარტებით, თუ თურქეთი მოთხოვნას გააგზავნის, ის ექსტრადიციის შესახებ ორ ქვეყანას შორის 30 წლის წინ გაფორმებული შეთანხმების საფუძველზე განიხილება.

“ამ ეტაპზე ბატონი გიულენის ექსტრადიციასთან დაკავშირებით არანაირი ოფიციალური მოთხოვნა არ მიგვიღია. თუ მას მივიღებთ, მაშინ მოხდება შეფასება ექსტრადიციის ხელშეკრულების საფუძველზე, რომელსაც შეერთებულმა შტატებმა და თურქეთმა 30 წლის წინ მოაწერეს ხელი. აქ ორი ფაქტორი იქნება გასათვალისწინებელი - მოთხოვნა შეესაბამება თუ არა იმ დანაშალებებს, რაც ხელშეკრულებით არის გათვალისწინებული და თუ პასუხობს მტკიცებულებები შეთანხმებით დაწესებულ სტანდარტებს,“ - განაცხადა თეთრი სახლის პრეს მდივანმა ჯოშ ერნსტმა.

სახელმწიფო დეპარტამენტი კი თურქეთის მთავრობას აფრთხილებს, არ გადააჭარბოს დემოკრატიულ საზღვრებს ეჭვმიტანილების დასჯის პროცესში. მარკ ტონერის თქმით, გიულენი კანონის დაცვით, მშვიდობიანად ცხოვრობს პენსილვანიაში.

„ჩვენ თურქ პარტნიორებს ვაფრთხილებთ, რომ მომხდარის შემდეგ ისინი დემოკრატიული იდეალების ერთგულები დარჩნენ. კარგად გვესმის, როგორ აღიქვამენ ფატულა გიულენის როლს თურქეთის მთავრობა და ქვეყნის პოლიტიკური ლიდერი. თუმცა, რამდენადაც ჩვენ ვფლობთ ამის შესახებ ინფორმაციას, ის კანონის დაცვით, მშვიდობიანად ცხოვრობს პენსილვანიაში,“ - განაცხადა ამერიკის შეერთებული შტატების სახელმწიფო დეპარტამენტის პრესმდივანმა მარკ ტონერმა.

ამ თემაზე გაამახვილა ასევე ყურადღება რეჯებ ტაიპ ერდოღანთან სატელეფონო საუბრისას ნატოს გენერალურმა მდივანმა. იენს სტოლტენბერგმა დაგმო სამხედრო ამბოხის მცდელობა და თურქეთს ალიანსის სახელით მხარდაჭერა გამოუცხადა.