"მორწმუნეები დიქტატორებს არ ებოდიშებიან" - ფეთჰულა გიულენი ერდოღანს პასუხობს

მსოფლიო - 12:52, 18 Jul, 2016

6970

აშშ-ში მცხოვრები მუსლიმი ღვთისმსახური ფეთჰულა გიულენი აცხადებს, რომ თუ მისი კავშირი სახელმწიფო გადატრიალების მცდელობასთან დამტკიცდება, მას თურქეთში ექსტრადირების არ ეშინია.
„არ მაღელვებს ექსტრადირების საკითხი, არც სიკვდილის მეშინია. მაგრამ, საკუთარი ღირსების წინააღმდეგ წასვლას არ ვაპირებ. ერდოღანმა ადრეც მოითხოვა ჩემგან ბოდიშის მოხდა, მაგრამ მორწმუნეები დიქტატორებს არ ებოდიშებიან. რა თქმა უნდა, თუ იქნება ჩემი ექსტრადირება სავალდებულო და საფრთხე დაემუქრება ამერიკისა და თურქეთის ურთიერთობებს, მე ბრძანებას დავემორჩილები. არავისთან არ ვაპირებ მისვლას და ხვეწნას. ვისაც ნანახი აქვს თურქეთში წინა სახელმწიფო გადატრიალებები, სცენარი ნაცნობი იქნება. ხელისუფლება ცდილობდა სამხედროების გაკონტროლებას, მაგრამ ვერ შეძლო. ახლა ამას მთავრობა ოპოზიციაზე ზეწოლის გამართლების მიზნით გამოიყენებს" - განაცხადა გიულენმა.

თურქეთის ხელისუფლება ფეთჰულა გიულენის 16 ივლისის ამბოხის ორგანიზატორად მიიჩნევს. პრეზიდენტმა რეჯეპ ტაიპ ერდოღანმა აშშ-სგან გიულენის ექსტრადირება მოითხოვა.

ერდოღანს გიულენი თურქეთის მტრად ჰყავს გამოცხადებული. ფეთჰულა გიულენი 1999 წლიდან პენსილვანიაში ცხოვრობს.