ცნობილი სიცილიელი მაფიოზი ბერნარდო პროვენცანო მილანის ციხეში, 83 წლის ასაკში გარდაიცვალა.

პროვენცანო, რომელიც სიცილიური მაფიის ლიდერი იყო, პატიმრობაში ათი წელი იმყოფებოდა. ის 2006 წელს რამდენიმე მძიმე დანაშაულისთვის დააკავეს, მათ შორის იყო 1992 წელს ორი მოსამართლის მკვლელობისთვის. პროვენცანოს სამუდამო პატიმრობა ჰქონდა მისჯილი.

მანამდე ბერნარდო პროვენცანო სამართალდამცველებს 43 წლის განმავლობაში ემალებოდა. დაკავების დროს იტალიის პოლიციას "კოზა ნოსტრას" ლიდერის მხოლოდ ერთი სურათი ჰქონდათ, რომელიც 1959 წელს არის გადაღებული.

იტალიური მედიის ინფორმაციით, ბოლო წლებში ბერნარდო პროვენცანოს შარდის ბუშტის სიმსივნე დაუდგინეს. სიცოცხლის უკანასკნელი ორი წელი მან ციხის საავადმყოფოში გაატარა.