აშშ-ში, ტეხასის შტატის ქალაქ უეტერფორდის საოლქო სასამართლოს შენობაში, პატიმრები კამერიდან გაიქცნენ.

გამოიცანით, რატომ გაიქცნენ პატიმრები?

როგორც გაირკვა, ისინი დაცვის თანამშრომლის გაადასარჩენად გაიქცნენ.

ინციდენტი 23 ივნისს მოხდა. პატარა ოთახში მდებარე კამერაში 8 პატიმარი იმყოფებოდა. მოპირდაპირე მხარეს, სკამზე დაცვის თანამშრომელი იჯდა, რომელიც მათთან საუბრობდა. მოულოდნელად, დაცვის თანამშრომელი სკამიდან გადავარდა. პატიმრებმა დასახმარებლად სამართალდამცავებს დაუძახეს, თუმცა ხმა ვერ მიაწვდინეს და ერთ-ერთმა პატიმარმა კარის გატეხვა გადაწყვიტა.

კარის გატეხვის შემდეგ, პატიმრები კამერიდან გაიქცნენ და იმ ოთახის კარებზე დაიწყეს ბრახუნი, სადაც სავარაუდოდ ხალხი იმყოფებოდა.

ხმაურზე სამართალდამცავები გამოვიდნენ და მანამ , სანამ მომხდარის შესახებ გაიგებდნენ, პატიმრებს კამერაში დაბრუნება უბრძანეს. ამ დროს ერთ-ერთმა პატიამრმა ავადმყოფი მცველისთვის გულის მასაჟის გაკეთება დაიწყო და მცველი ნელ-ნელა გონზე მოვიდა.

როგორც გაირკვა, დაცვის თანამშრომელს გულის შეტევა ჰქონდა და რომ არა პატიმრების დახმარება, შედეგი ფატალური აღმოჩნდებოდა. რაც შეეხება პატიმრებს, მათი თქმით, კამერიდან გაქცევა აზრადაც არ მოსცლიათ - „მცველი კარგი კაცია“ განაცხადა ერთ-ერთმა მოგვიანებით.

მართალია, მცველის ვინაობა არ სახელდება, თუმცა ცნობილია, რომ ის თავს უკეთ გრძნობს და მალე სამსახურსაც დაუბრუნდება.