სტამბოლის ტერაქტთან კავშირში ეჭვმიტანილი კიდევ 7 პირი დააკავეს

მსოფლიო - 13:59, 11 Jul, 2016

1526

თურქეთში, ათათურქის სახელობის საერთაშორისო აეროპორტში მომხდარ ტერაქტთან კავშირში ეჭვმიტანილი კიდევ შვიდი ადამიანი დააპატიმრეს.

ადგილობრივი პრესის ცნობით, ყველა მათგანი უცხოელია. მათ ბრალად ედებათ შეიარაღებული ტერორისტული დაგუფების წევრობა და განზრახ მკვლელობის ხელშეწყობა.

შეგახსენებთ, ტერაქტში ეჭვმიტანილ 13 პირს წინასწარი პატიმრობა შეუფარდა. თურქული მედიის ცნობით, თურქეთის ათ მოქალაქეს და სამ უცხოელს მკვლელობებსა და ტერორისტულ ორგანიზაციაში მონაწილეობაში ედებათ ბრალი.
თურქეთის პრეზიდენტის, რეჯეპ ტაიპ ერდოღანის განცხადებით, დაკავებულებს შორის არიან დაღესტნის, ყირგიზეთისა და ტაჯიკეთის მოქალაქეები.
შეგახსენებთ, 28 ივნისს, 22 საათსა და 15 წუთზე, ათათურქის აეროპორტში ორმა თვითმკვლელმა ტერორისტმა ჯერ ცეცხლი გახსნა, შემდეგ კი თავი აიფეთქა . ერთი ტერორისტი სამართალდამცავებმა მოკლეს. ტერაქტის შედეგად 45 ადამიანი დაიღუპა, დაშავდა 200. 49 ადამიანი ამ დრომდე საავადმყოფოში რჩება, მათგან 17-ის მდგომარეობა კრიტიკულია.
ერთი აფეთქება საერთაშორისო ტერმინალთან მოხდა, სადაც ტაქსებს მგზავრები შეჰყავთ. ტერორისტმა სავარაუდოდ "კალაშნიკოვის" ტიპის იარაღიდან ცეცხლი გახსნა, შემდეგ კი თავი აიფეთქა. ტერორისტის მიერ ცეცხლის გახსნას, პოლიციის მხრიდან საპასუხო სროლა მოჰყვა. მეორე აფეთქება ადგილობრივ ტერმინალთან მოხდა. აფეთქების მომენტი სათვალთვალო კამერამ დააფიქსირა.დაშავებულები საავადმყოფოებში ტაქსების მძღოლებმა და სასწრაფოს ეკიპაჟებმა გადაიყვანეს.

აფეთქებაზე პასუხისმგებლობა ჯერჯერობით არცერთ დაჯგუფებას არ აუღია. თუმცა, თურქეთის პრემიერის თქმით, ტერაქტის უკან დიდი ვარაუდით "ისლამური სახელმწიფო" დგას.