,,ბიძინა-მიშას დაპირისპირება დამანგრეველია ქვეყნისთვის“

,,ბიძინა-მიშას დაპირისპირება დამანგრეველია ქვეყნისთვის“ - ინტერვიუ გიორგი ვაშაძესთან

პოზიცია - 15:17, 07 Jul, 2016

4670

ქვეყანას სჭირდება ახალი პოლიტიკური ლიდერები... არჩევანი წარსულსა და მომავალს შორის - ეს გიორგი ვაშაძის პოლიტიკური გზავნილია, რომელმაც 2016 წლის პარლამენტის არჩევნებში ბრძოლა ,,ნაციონალური მოძრაობის" გარეშე, საკუთარ პოლიტიკურ გუნდთან ერთად გადაწყვიტა.

რა ფორმით მიიღებს ვაშაძის ,,ახალი საქართველოს“ არჩევნებში მონაწილეობას, რომელ პოლიტიკურ ძალებს განიხილავს მის იდეურ მოკავშირედ და რატომ ფიქრობს, რომ იმ ტიპის ორგანიზაცია, როგორიც ,,ნაციონალური მოძრაობაა“, ვერ შეძლებს ,,ქართული ოცნების“ დამარცხებას.

,,ნიუპოსტი“ გიორგი ვაშაძეს ესაუბრა.

საუბარი ქვეყნისათვის უმნიშვნელოვანესი ვიზიტის შეფასებით დავიწყოთ, გახსოვთ ალბათ, 2012 წლის საპარლამენტო არჩევნების წინ საქართველოს აშშ-ს იმჟამინდელი სახელმწიფო მდივანი ესტუმრა, კლინტონის მთავარი მესიჯი სწორედ დემოკრატიულ და სამართლიან არჩევნებს ეხებოდა, ამჯერად კერი ეწვია საქართველოს. როგორ ფიქრობთ, რა არის ჩვენი პარტნიორი სახელმწიფოს მთავარი მესიჯი დღევანდელი ხელისუფლების მიმართ?

მთავარი მესიჯი შეერთებულ შტატებიდან არის სწორედ სამართლიანი არჩევნები, არჩევნების ნორმალურ გარემოში ჩატარება იმიტომ, რომ საარჩევნო თარიღის გამოცხადებამდეც დაიძაბა საარჩევნო გარემო. იყო გარკვეული ინციდენტები და ვფიქრობ, რომ სწორედ ამას უკავშირდება ის მკაფიო გზავნილი აშშ-ს მხრიდან, რომ არჩევნები, რომელსაც ჩვენ ვატარებთ შეფასდება კონკრეტულად - ეს არის დემოკრატიული თუ არადემოკრატიული. ამიტომ ვფიქრობ, რომ მკაფიო გზავნილს, რასაც მიიღებს ამ ვიზიტით ხელისუფლება ეს არის არჩვნები უნდა ჩატარდეს სამართლიან გარემოში, კანონის შესაბამის გარემოში და არუნდა მოხდეს ადმინისტრაციული თუ პოლიციური რესურსების გამოყენება იმისთვის, რომ მანიპულაცია დაიწყოს თვითონ არჩევნების. სამწუხაროდ, „ქართული ოცნება“ არის პოლიტიკური ძალა, რომელიც რასაც აკრიტიკებდა 2012 წლის არჩვენებამდე, ზუსტად იგივეს აკეთებს, კიდე გაუარესებულ პირობებში სხვადასხვა რაიონებში. მაგალითად, კვირას მე ვიყავი ლაგოდეხის რაიონში, ყვარელის რაიონში, გურჯაანში და წარმოიდგინეთ, რომ სუს-ის და კუდ-ის მანქანები ისევ ჩაბურული შუშებით დაგვყვებიან, იქ სამარშუტო ტაქსის მძღოლი გააჩერეს სადღაც, მეორეგან ვიღაცას დაემუქრენ, რომ არ მიხვიდე ამ ღონისძიებაზე და ამ შეკრებაზე. სამწუხაროდ, ეს წესები დაამძიმეს და კიდევ უფრო უარესი სიტუაციაა.

ანუ წინა ხელისუფლებების მეთოდები არ იცვლება?

იმიტომ, რომ არანაირი ახალი იდეა არ აქვს „ქართულ ოცნებას“, არანაირი შესაძლებლობა არა აქვს, რომ რაღაც ახალი პროცესი შექმნას, ახლებურად მიუდგეს საკითხებს. ნამდვილად, ძალიან რთულ სიტუაციაში არიან.

ამავდროულად არსებობს ამერიკა-საქართველოს სტრატეგიული თანამშრომლობის ქარტია, ეს მოიცავს სამხედრო, ეკონომიკური, სამართლებრივ სფეროში თანამშრომლობის საკითხებს. მიჰყვება კი ამას ,,ქართული ოცნების" ხელისუფლება?

ქარტია შეიძლება არსებობდეს, მაგრამ შენ რამდენად აქტიური ხარ და რამდენად იყენებ ქარტიის სხვადასხვა მუხლებს, ამ შეთანხმებების სხვადასხვა პუნქტებს, ააქტიურებ არ ააქტიურებ როგორც სამხედრო, ასევე ეკონომიკური თვალსაზრისით, ეს უკვე შენზეა დამოკიდებული. მე ვფიქრობ, რომ ზოგადად საერთაშორისო ასპარეზზე საქართველომ დაკარგა ინიციატივა ანუ ინიციატივა არ გვაქვს არაფრის ჩვენ უბრალოდ მივყვებით პროცესს, უბრალოდ დინებას მივყვებით და ეს სამწუხაროდ ნეგატიურად აისახება ჩვენს იმიჯში და შესაბამისად ეს ქმნის ძალიან სერიოზულ პრობლემებს აქედან გამომდინარე მე ვფიქრობ, რომ სამწუხაროა მაგრამ ფაქტია, რომ ძალიან სერიოზული დარტყმის და პრობლემების წინაშე ვართ. იმიტომ, რომ მარტო აღმოვჩნდით რაღაც პროცესში საერთაშორისო ასპარეზზე და განა ის, რომ აშშ მხარს ან დასავლეთი მხარს აღარ გვიჭერს, არა რა თქმა უნდა - მხარს გვიჭერს, მაგრამ ასეთი შერბილებულ-ლოიალური პოლიტიკა იგივე რუსეთთან მიმართებაში ვერავინ ვერ გაიგო საბოლოო ჯამში. რა თქმა უნდა, იქნებიან პოლიტიკოსები, რომლებიც ამას მოგიწონებენ, იმას ხომ არ იტყვიან, აი, ძალიან ცუდი დიპლომატიური ურთიერთობები გაქვს, ან არასწორად იქცევი საგარეო ასპარეზზე. „ქართული ოცნება“ ძალიან ხშირად ამბობს, რომ მოწონთ ჩვენი დამოკიდებულება და ასე შემდეგ, ნამდვილად არ გეტყვიან, რომ ცუდად იქცევი არასწორად იქნეცი და რაც ნაკლები თავის ტკივილი ექნება ზოგიერთ ქვეყანას საქართველოსთან მიმართებაში, ის ურჩევნიათ. მე ვფიქრობ, ეს ინიციატივა ხელიდან გაშვებულია და ჩვენ ახლა დინებას მივყვებით, გვაქვს გარკვეული შეთანხმებები, მათ შორის ეგ შეთანხმებაც, მაგრამ რა? ვიყენებთ ამას, ყველა პუნქტს ვააქტიურებთ თუ არ ვააქტიურებთ ეს უკვე სხვა საკითხია.

,,ოცნებამ“ ხელისუფლებაში მოსვლის დროსვე განაცხადა, რომ საქართველო არუნდა იყოს პრობლემა რუსეთსა და დასავლეთს შორის...

საქართველო არუნდა იყოს პრობლემა რუსეთსა და დასავლეთს შორის მოლაპარაკებებში. ამის შედეგად ჩვენ მივიღეთ მცოცავი ოკუპაცია, გატაცებული, მოკლული ადამიანები საოკუპაციო ხაზთან,ამის შედეგად მივიღეთ ძალიან ბევრი საერთაშორისო დონეზე ჩვენი ინტერესების შელახვა მე მაგალითად შევეცდებოდი, სადაც უკრაინა განიხილება იქ საქართველოც განიხილებოდეს, იმიტომ, რომ ჯერ მოხდა საქართველოს ტერიტორიის ოკუპაცია და შემდეგ უკრაინის ანექსია და ოკუპაცია ამიტომ, ვფიქრობ, რომ ესეც ძალიან სერიოზული შეცდომაა საგარეო ვექტორის კუთხით. ზოგადად გეოპოლიტიკურად ჩვენს გარშემო ბევრი რამ იცვლება. პროცესები თავიდან ბოლომდე იცვლება - რუსეთი, თურქეთი, სირია, უკრაინა... ყველაფერი იცვლება და ამ დროს, როცა შენ ხარ მაჩანჩალა საგარეო ასპარეზზე ეს არის ძალიან ცუდი და დამანგრეველი.

ამ ვითარებაში რამდენად სწორად მიგაჩნიათ ამერიკაში საქართველოს ელჩის განცხადება ?

ეს მიუთითებს, რომ ჩვენ ვართ კატასტროფულ დღეში, როცა ასეთი ელჩი გვყავს ამერიკის შეერთებულ შტატებში. ისეთი განცხადება იყო, გეგონება რუსეთში საქართველოს ელჩმა გააკეთა ეს. არც იმან უნდა გააკეთოს ეგეთი განცხადება... ასეთ ვითარებაში მე დაუყოვნებლივ გამოვიწვევდი ელჩს, ღირებულების თვალსაზრისით სხვგან დგას ეს ადამიანი. მუშაობს ამერიკასთან ურთიერთობის დალაგებაზე და ღირებულებებით სხვგან დგას. როგორ შეიძლება ამ ადამიანმა ჩვენ წინ წაგვწიოს აშშ-სთან ურთიერთობებში და ეტყობა კიდეც ამერიკაში საქართველოს საელჩოს მუშაობას. ბევრი კრიტიკაც ისმის ხოლმე საელჩოს მუშაობასთან დაკავშირებით.

ფსიქოლოგიური სინდრომი, რომლითაც მოვიდა „ქართული ოცნება“, გზავნილი, რომელიც ბიძინა ივანიშვილმა ჩაუდო ოცნებას არის ის, რომ არ გვქონდეს ზედმეტი პრეტენზია, ვიყოთ ჩვენთვის, ნუ ავტეხავთ პანიკებს რაღაც საკითხებზე, არ ჩევაწუხოთ. პრორუსულობა რაში უნდა გამოიხატებოდეს? მაინცდამაინც ხო არ უნდა გამოვიდეს „ქართული ოცნება“ და თქვას რუსეთთან შეერთებას ვაპირებ ან ევრაზიულ კავშირში შესვლას ვაპირებთო? თვითონაც იციან ამას რაც მოყვება... პრორუსულობა მაინც და მაინც ამ საკითხში არ გამოიხატება, პრორუსულობა გამოიხატება ამ შერბილებულ პოზიციებში, რომ საქართველო აღარ უქმნის პრობლემას საერთაშორისო ასპარეზზე რუსეთს. მაშინ, როდესაც ნებისმიერი განხილვის დროს ნომერ პირველი საკითხი იყო რუსეთთან მიმართებაში საქართველოს სიტუაცია. ამიტომაც იყო მაგალითად იმ ღობის გაყვანა, რომელსაც საოკუპაციო ზოლზე ახლა აკეთებს რუსეთი, ფაქტია, ვერ ბედავდა ადრე. მე არც იმის მომხრე ვარ, რომ გამოხვიდე და დედა აგინო... არ არის ეს სწორი პოლიტიკა, აქ ბალანსი რა თქმა უნდა საჭირო და შესანარჩუნებელია, თუმცა, ყველაზე მთავარი არის აქ დიპლომატიური მექანიზმების გამოყენება საერთაშორისო ასპარეზზე, სხვადასხვა მოლაპარაკებების ფორმატში - ევროსაბჭო, ევროკავშირი, გაერო, აშშ, ეს მთლიანად უნდა გვქონდეს დალაგებული.

პრორუსული პოლიტიკა ვახსენეთ და ამ ბოლო დროს საქართველოში მომრავლდა პრორუსული ჯგუფები, აქვთ ფინანსები მეტი, ვიდრე დასავლური ორიენტაციის პოლიტიკურ ჯგუფებს. თავის დროზე, ნაციონალურ მოძრაობას შეიძლება ითქვას, მონოპოლიზებული ჰქონდა პროდასავლური ველი და ამ იდეოლოგიის პარტიებისთვის პოლიტიკური სივრცე იყო ერთგავრად ჩაკეტილი. პროდასავლურობა თითქოსდა ასოცირდებოდა ნაციონალურ მოძრაობასთან იმ ადამიანებისთვსი, ვინც რადიკალურად იყვნენ და არაინ განწყობილი ამ პოლიტიკური ძალის მიმართ და ეს იწვევდა ერთგვარ აგრესიაც კი პროდასავლური პოლიტიკისადმი. ასეთმა მიდგომამ ხომ არ განაპირობა ის, რომ გააქტიურდნენ პრორუსული ძალები და ხომ არ ფიქრობთ, რომ დღეს ამ ფონზე მნიშვნელოვანია დასავლური ტიპის პოლიტიკური ძალების მეტი კონსოლიდირება?

პირველი და მნიშვნელოვანი, რუსეთი სტანდარტული სტრატეგიაა არამარტო აქ არამედ სხვა ქვეყნებშიც, რომ პატარ-პატარა ეს რადიკალური ჯგუფები დააფინანსოს, რომლებიც აქტიურად სხვადასხვა პოზიციებით გამოდიან პოპულისტური პოზიციებით, რომელსაც პოლიტიკურ სპექტრში შეაქვს დისონანსი. მე ვფიქრობ, რომ რუსეთის სტრატეგია საქართველოსთან მიმართებაში შეიცვალა და მას უნდა, რამდენიმე პატარა პოლიტიკური ჯგუფი იყოს რომელმაც იქნება და „გაარტყას“ და გაამართლოს. არ აპირებს როგორც ჩანს ჩამოკიდოს ერთ პოლიტიკურ ჯგუფს თავისი მხარდაჭერა, როგორც ნინო ბურჯანაძის შემთხვევაში გააკეთა თავის დროზე. მას გამოკვეთილად მხარდაჭერა ჰქონდა რუსეთიდან და ამას მგონი არც თვითონ მალავდა, ის იდგა კრემლის წინ და იბარებდა აღლუმს.

მე შემიძლია ნაწილობრივ დაგეთანხმოთ, რომ ,,ნაციონალურ მოძრაობას“ ქონდა გარკვეულწილად მონოპოლიზებული პროდასავლური ფლანგი, ნეგატივი, რაც იყო ნაციონალური მოძრაობის მიმართ იყო ნეგატივი დასავლეთის მიმართ. მაგრამ ესეც რაღაც დროებითი შეგრძნებებია. გაიშალა დღეს პროდასავლური ფლანგი და აქედან გამომდინარე, პირიქით კარგია, რომ გაიშალა, რადგან დღეს დიდი არჩევანი აქვს ამომრჩეველს და მის გემოვნებას დააკმაყოფილებს ყველა ტიპის არჩევანი, რომელიც დღეს არის.

მეორე მნიშვნელოვანი საკითხი, რაც დღეს ხდება, კვლევებში ჩანს, რომ ის აწევა პრორუსული ძალების უკან მოდის. რაღაც მომენტში მომატებული იყო რუსეთთან ინტეგრაციის თუ ევრაზიული კავშირის მხარდაჭერთა რაოდენობა. ამან როგორც ჩანს გააქტიურა ეს პატარ-პატარა შავბნელი ჯგუფები, რომლებიც სადღაც იმალებოდნენ 90-იანი წლების ადამიანები, რომლებიც დღეს გამოდიან და საოცარ განცხადებებს აკეთებენ. მე ვფიქრობ, რომ ეს დროებითია. საქართველოში შინაგანი არჩევანი მაინც პროდასავლურია, ჩვენ ვართ დასავლური ცივილიზაციის ნაწილი და რა თქმა უნდა, იქნება ყოველთვის პრორუსული ორიენტაციის ჯგუფები. ეს არ ნიშნავს, რომ ჩვენ ამას ყურადღება არ უნდა მივაქციოთ, მაგრამ უნდა გვქონდეს აქტიური პოლიტიკური სტრატეგია, რათა არ მოხდეს საზოგადოების აზრის მანიპულირება.

არჩევნებს თუ გადავხედავთ, ქართველი ამომრჩეველი პროდასავლურ არჩევანს უფრო აკეთებს. იმიტომაც არის, რომ „ქართულმა ოცნებამ“ მოიშორა პრორუსული ორიენტაციის ვინც იყო შიგნით. კარგა ხანს ფიქრობდნენ როგორც სჩანს, თუ როგორ უნდა აეწყოთ თავიანთი საარჩევნო სტრატეგია და მათაც ნახეს, რომ პრორუსული ორიენტაციის ჯგგუფების არსებობას მათ რიგებში ნაკლები ელექტრორატი და მეტი პრობლემა მოჰყვებოდა. შესაბამისად, ისინი ფაქტობრივად ჩამოაშორეს და გაწიეს პროცესებიდან. ვფიქრობ, რომ მაინც პროდასავლურის სასარგებლოდ აკეთებს არჩევანს მოსახლეობა, თუმცა ზოგიერთი პოლიტიკური ძალა მაინც ცდილობს მანტია ჩამოიფაროს, რომ პროდასავლური ვარ. ირმა ინაშვილიც ამბობს, რომ დასავლეთთან ინტეგრაცია უნდა, მათ შორის „ქართული ოცნებაც“... გვყავდა მეჭიაური, აქტიური სახე, რომელმაც პირდაპირ განაცხადა, რომ არა ნატო და ვთქვათ ევრაზიული კავშირი. მოკლედ, საკითხი არის შემდეგი - ყველაფერი დამოკიდებულია ჩვენს აქტიურ მუშაობაზე. მე ამას ამომრჩეველს არ ვაბრალებ, ჩვენ უნდა ვიმუშაოდ აქტიურად.

რას აპირებთ ამ მიმართულებით?

ვფიქრობ, რომ პროდასავლური ძალები, ვინც არიან გარკვეული კონსოლიდაცია შეიძლება მოხდეს პროდასავლური ფლანგის, რომ უფრო ძლიერი იყოს ის კამპანია, რაც აგვისტო-სექტემბერში მაქსიმალურად გააქტიურდება. ასევე მნიშვნელოვანია, დასავლური ღირებულებები კარგად ესმოდეს ყველას რა არის. ეს არაა მარტო ის, რომ მინდა ევროკავშირში ინტეგრაცია, ეს არის შენი შინაგანი განწყობების და გადაწყვეტილელები ყოველდღიურ რეჟიმში რამდენად ხელს უწყობს ამა თუ იმ პროცესის დაწყებას.

მთავარი მესიჯი ეს გექნებათ არჩევნებისთვის?

ჩვენი მთავარი გზავნილი არის ახალი ადამიანები პოლიტიკაში, ეს არის ყველა თაობის ადამიანები, ცოცხალი ცოდნით, პროფესიონალიზმით, ენერგიით, პოზიტიური მიდგომით. რაღაცნაირად ქართულ პოლიტიკას ჭირდება თაობათა ცვლა, ის ადამიანები, რომლებიც დიდი ხანია არიან პოლიტიკაში, არიან ოპოზიციაში, და მათ აქვთ პრობლემა გადალახონ შინაგანი ბარიერები, მაგალითად დაპირისპირების, შურისძიების, ბოღმის და ეს დიდ პრობლემას ქმნის პოლიტიკაში. თუ ვსაუბრობთ პროდასავლურობაზე, სწორედ ეს ქმნის ყველაზე დიდ კონფლიქტს პროდასავლურობასთან. დასავლეთი იმას კი არ გეუბნება, რომ მაგალითად, ნაციონალურ მოძრაობას ხელი არ მოჰკიდო - გეუბნება იმას, რომ არ შეიძლება ეს სიძულვილის ენა, არ შეიძლება პოლიტიკურად მოტივირებული დამოკიდებულება. ეს მათი სტანდარტებია. ადამიანს მოგწონს არ მოგწონს, ეს უნდა გაითვალისწინო, თუ საქართველოში ისევ შენარჩუნდა პროცესი, როცა ხელისუფლებები შეიცავლებიან შურისძიების მოტივით, მაშინ ჩვენ წინსვლის კუთხით ძალიან სერიოზული პრობლემა გვექნება.

„ნაციონალურ მოძრაობაში იყო ახალი ადამიანების პრობლემა? ისინი ამბობდნენ, რომ სიის პრობლემა გქონდათ...

მე სიის პრობლემა, რომ არ მქონდა ეს თვითონაც კარგად იციან. მე მქონდა იმის პრობლემა, რომ ვერ ვხედავდი იმ მექანიზმის ცვლილების და განახლებისკენ გადადგმულ ნაბიჯებს, რაც ჭირდება პოლიტიკურ ორგანიზაციას. ვერტიკალური და ცენტრალიზებული მართვის სისტემის დრო აღარ არის. ჩვენ ოფისსაც რომ უყურებთ, ესეც ახალია, ყველა ლიდერია, ყველა დამოუკიდებელია, ყველა თავისუფალია მათ აქვთ თავიანთი აქტივობები. გაზეთი დავბეჭდეთ და ჩემთვისაც სიურპრიზი იყო, რამდენი ადამიანი არიგებს უკვე ამ გაზეთს სხვადასხვა ადგილას, სრულიად მოხალისეობრივად, ახალგაზრდული ჟინით, ენერგიით. ეს სრულიად სხვა რაღაც არის, სხვა ენერგეტიკაა და ვფიქრობ, რომ სწორედ ამ მიმართულებით არის შესაცვლელი და მე ჩემს განცხადებაშიც განვმარტე, როცა ეს ნაბიჯი გადავდგი - ამოცანა ნომერი ერთი ეს არის „ქართული ოცნების“ ჩამოშორება ხელისუფლებიდან. იმიტომ, რომ ის რაც დღეს ხდება არის კატასტროფა. მე ვფიქრობ, იმ ტიპის ორგანიზაცია, როგორიცაა „ნაციონალური მოძრაობა“ ცოტა რთულია ამის გაკეთება.

თქვენ ამბობთ ესეთ რაღაცას, რომ „ნაციონალური მოძრაობა“ არ იბრძოდა ხელისუფლებაში მოსასვლელად?

შეიძლება იბრძვის, მაგრამ მე იმ ბრძოლისთვის მზადების სტრატეგიის არ მჯერა...

ფიქრობთ, რომ მხოლოდ პარლამენტში შესვლით დაკმაყოფილდებიან?

პროგრამა მინიმუმი ეს არის, მაგრამ პროგრამა მაქსიმუმი რა თქმა უნდა, გაცხადებულია, რომ უნდათ ხელისუფლებაში დაბრუნება. უბრალოდ მე ამ მუშაობის პროცესით არ მჯერა, რომ ეს მოხდება.

მიხეილ სააკაშვილის ფაქტორს როგორ უყურებთ?

ჯერჯერობით არის, თუმცა უფრო და უფრო სუსტი. მათ შორის ნაციონალურ მოძრაობაშიც ბევრი პრობლემაა სააკაშვილთან მიმართებაში. ეს ფაქტორები სუსტდება. ყველაფერს აქვს თავისი დრო და თავისი ვადა. ახლა მე ვფიქრობ, არის დრო ახალი პოლიტიკური ლიდერები წამოვიდნენ წინა ასპარეზზე.

ბიძინა მიშას დაპირისპირება ჩემი აზრით, დამანგრეველია ქვეყნისთვის და ამიტომ სჭირდება სრულიად ახალი პროცესი.

და ბოლოს, უკრაინაში თქვენი ორგანიზაციის საქმიანობის შესახებაც რომ ვითხრათ, როგორც ვიცით უკრაინელი მხარდამჭერებიც იყვნენ თქვენს ღონისძიებაზე...

ბევრი ჩამოდის და მეხმარება უკრაინიდან, უკრაინაში ინოვაციების და განვითარების ფონდი ჩემი ორგანიზაცია უკვე კარგა ხანია მუშაობს, ეხლაც იღებს მონაწილეობას სხვადასხვა პროექტების რეალიზებაში, ივლისში გვექნება იუსტიციის სახლის გახნა კიევში. ივლისი-აგვისტო მთავრდება ეს მშენებლობის პროცესი. გარდა ამისა, ვნერგავთ ელექტრონული აუქციონების სისტემას, რომელიც პირველი ელექტრონული პროდუქტი იქნება პლოგჯეინზე აწყობილი და ძალიან სერიოზულ გარღვევას ვაკეთებთ ამით, და გვყავს ძალიან მაგარი გუნდი ქართველებისაც, უკრაინელებისაც, და უცხოელებიც იღებენ მონაწილეობას, გვაქვს ძალიან დიდი ოფისი, სადაც იმართება შეხვედრები, მრგვალი მაგიდები, რომელსაც ჰქვია რეფორმების ლაბორატორია, სადაც ინკუბაცია და იდეების გენერირება ხდება. მთავარი ის არის, რომ რეფორმას, რომელსაც ჩვენ ვთავაზობთ, ეს არის ახალი თაობის რეფორმები ანუ არ არის კოპირება იმის რაც საქართველოში გავაკეთეთ სრულიად ახალი სტანდარტით ახალი თაობის რეფორმების მუშაობისთვის.

რა მოლოდინები გაქვთ ამ არჩევნებზე?

ბოლოს, ვფიქრობ რომ ძალიან საინტერესო საარჩევნო პროცესი გველოდება და იმედი მაქვს,რომ ამომრჩეველი გააკეთებს არჩევანს არა ცუდსა და უარესს, არამედ წარსულსა და მომავალს შორის.