"ნიუპოსტი" უცვლელად გთავაზობთ ამ განცხადებას.

მწერლების სოლიდარობა ქართულ გამომცემლობებს

მივესალმებით განათლებისა და მეცნიერების სამინისტროს ინიციატივას სასკოლო სახელმძღვანელოების უფასოდ დარიგების შესახებ. თუმცა, სამწუხაროდ, ის გზა, რომელიც სამინისტრომ აირჩია სოციალური სამართლიანობისა და განათლების ხელმისაწვდომობის გასაუმჯობესებლად, შეიცავს დიდ საფრთხეებს, ხელყოფს ავტორებისა და გამომცემლობების ინტელექტუალური საკუთრების უფლებებს და არღვევს საქართველოს კონსტიტუციის 23-ე მუხლს, რომლის მიხედვითაც "ინტელექტუალური შემოქმედების თავისუფლება უზრუნველყოფილია. ინტელექტუალური საკუთრების უფლება ხელშეუვალია".

თუ ასე ხელაღებით და თვითნებურად განხორციელდა ეს ინიციატივა, ჩვენ ვშიშობთ, რომ განვითარებას შეწყვეტს ქართული სახელმძღვანელოების შექმნის კულტურა, რომელიც ბოლო პერიოდში ჩამოყალიბდა და მეტიც – ეს გადაწყვეტილება გამოიწვევს გამომცემლობების დახურვას, რადგან ისინი ვეღარ შეძლებენ სხვა სახის ლიტერატურული პროდუქტის შექმნას, რომელთა გამოცემაც პირდაპირ უკავშირდება სახელმძღვანელოებიდან შემოსულ თანხებს. ასევე დაზარალდებიან არა მხოლოდ გამომცემლები და სახელმძღვანელოების ავტორები, არამედ უამრავი ადამიანი დარჩება სამსახურის გარეშე. უკვე გაჩერებულია რამდენიმე სტამბა, ახლო მომავალში კი მოსალოდნელია დაიხუროს წიგნის მაღაზიებიც.

რაც არ უნდა კეთილი განზრახვა ამოძრავებდეს ვინმეს, ჩვენთვის მიუღებელია, თუნდაც ერთი მოქალაქის ინტერესებისა და უფლებების დარღვევის ხარჯზე მიღებული გადაწყვეტილება.

გვსურს მივმართოთ განათლებისა და მეცნიერების მინისტრს, დაფიქრდეს როგორი მნიშვნელოვანია კერძო ბიზნესი ჩვენი ქვეყნის განვითარებისთვის და რა დიდ როლს თამაშობენ დამოუკიდებელი გამომცემლები საქართველოს განათლების, ზოგადად კულტურისა და კონკრეტულად მწერლობისთვის. ვთხოვთ მინისტრს კიდევ ერთხელ გადახედოს აღნიშნულ საკითხს და ყველა პრობლემა გადაწყდეს დაინტერესებულ მხარეთა მოლაპარაკების გზით."

ხელს აწერენ:

თამაზ ჭილაძე, ბესიკ ხარანაული, ტარიელ ჭანტურია, ბაჩანა ბრეგვაძე, როსტომ ჩხეიძე, გივი შაჰნაზარი, მაკა ჯოხაძე, რეზო კვესელავა, ლევან ბრეგაძე, გენო კალანდია, გიორგი ლობჟანიძე, ირაკლი სამსონაძე, ლერი ალიმონაკი, მერი ტიტვინიძე, ნანა გოგოლაშვილი, დიანა ანფიმიადი, ირაკლი კაკაბაძე, სალომე ბენიძე, ნინო სადღობელაშვილი.