სტამბოლის ტერაქტთან კავშირში ეჭვმიტანილ 13 პირს წინასწარი პატიმრობა შეეფარდა

მსოფლიო - 12:31, 04 Jul, 2016

1498

თურქეთის სასამართლომ სტამბოლში, ათათურქის საერთაშორისო აეროპორტში მომხდარ ტერაქტთან კავშირში ეჭვმიტანილ 13 პირს წინასწარი პატიმრობა შეუფარდა. თურქული მედიის ცნობით, თურქეთის ათ მოქალაქეს და სამ უცხოელს მკვლელობებსა და ტერორისტულ ორგანიზაციაში მონაწილეობაში ედებათ ბრალი.

გამოძიების ცნობით, ბრალდებულებს კავშირი ჰქონდათ ექსტრტემისტულ დაჯგუფება “ისლამურ სახელმწიფოსთან”, რომელიც თურქეთის ხელისუფლების ვარაუდით, ათათურქის აეროპორტში მომხდარი ტერაქტის ორგანიზატორია.

28 ივნისს, 22 საათსა და 15 წუთზე, ათათურქის აეროპორტში ორმა თვითმკვლელმა ტერორისტმა ჯერ ცეცხლი გახსნა, შემდეგ კი თავი აიფეთქა . ერთი ტერორისტი სამართალდამცავებმა მოკლეს. ტერაქტის შედეგად 45 ადამიანი დაიღუპა, დაშავდა 200. 49 ადამიანი ამ დრომდე საავადმყოფოში რჩება, მათგან 17-ის მდგომარეობა კრიტიკულია.
ერთი აფეთქება საერთაშორისო ტერმინალთან მოხდა, სადაც ტაქსებს მგზავრები შეჰყავთ. ტერორისტმა სავარაუდოდ "კალაშნიკოვის" ტიპის იარაღიდან ცეცხლი გახსნა, შემდეგ კი თავი აიფეთქა. ტერორისტის მიერ ცეცხლის გახსნას, პოლიციის მხრიდან საპასუხო სროლა მოჰყვა. მეორე აფეთქება ადგილობრივ ტერმინალთან მოხდა. აფეთქების მომენტი სათვალთვალო კამერამ დააფიქსირა.დაშავებულები საავადმყოფოებში ტაქსების მძღოლებმა და სასწრაფოს ეკიპაჟებმა გადაიყვანეს.

აფეთქებაზე პასუხისმგებლობა ჯერჯერობით არცერთ დაჯგუფებას არ აუღია. თუმცა, თურქეთის პრემიერის თქმით, ტერაქტის უკან დიდი ვარაუდით "ისლამური სახელმწიფო" დგას.

ამასთან, თურქეთის ხელისუფლების ინფორმაციით, აეროპორტზე თავდასხმაში მონაწილე თვითმკვლელები რუსეთის, უზბეკეთისა და ყირგიზეთის მოქალაქეები იყვნენ. თურქული მედიის ინფორმაციით, რუსეთის მოქალაქე წარმოშობით ჩრდილოკავკასიელია, თუმცა ოფიციალურად აღნიშნულ ცნობა არ დადასტურებულა.

სტამბოლსა და იზმირში ჩატარებული სპეცოპერაციების დროს პოლიციამ აეროპორტში მომხდარ ტერაქტთან კავშირში ეჭვმიტანილი 29 ადამიანი დააკავა.