რუსეთის პრეზიდენტმა, ვლადიმერ პუტინმა „ეროვნული გვარდიის“ შესახებ კანონს ხელი მოაწერა. გვარდია უშუალოდ პრეზიდენტს დაემორჩილება. ამის შესახებ რუსული მედია იუწყება.
კანონის თანახმად, ეროვნული გვარდიის, როგორც სახელმწიფო სამხედრო ორგანიზაციის დანიშნულება სახელმწიფოებრივი და საზოგადოებრივი წესრიგის, კანონისა და ადამიანის თავისუფლების დაცვა იქნება.

გავრცელებული ცნობით, ჯარი ჩართული იქნება საზოგადოებრივი წესრიგის, მნიშვნელოვანი სახელმწიფო ობიექტების დაცვაში. ისინი ასევე მიიღბენ მონაწილეობას ტერორიზმთან და ორგანიზებულ დანაშაულთან ბრძოლაში, ასევე უზრუნველყოფს საგანგებო მდგომარეობის სამართლებრივ რეჟიმებსა და კონტრტერორისტულ ოპერაციებში.

კანონის თანახმად, ნაციონალური გვარდიის წევრს აქვს იარაღის ტარებისა და შენახვის უფლება, ასევე მას შეუძლია როგორც სამხედრო ფორმის, ისე სამოქალაქო ტანსაცმლის ტარება.

ნაციონალური გვარდიის ჯარების ფედერალურ სამსახურს გენერალი ვიქტორ ზოლოტოვი უხელმძღვანელებს, რომელიც მანამდე პრეზიდენტის პირად დაცვას, მოგვიანებით კი, შინაგან საქმეთა სამინისტროს ძალებს ხელმძღვანელობდა.

აღნიშნული გვარდიის შექმნის შესახებ ინფორმაცია მიმდინარე წლის აპრილში გავრცელდა. მაშინვე მედიაში უკვე გავრცელდა ვარაუდი, რომ პუტინს მომავალი არჩევნებისთვის არეულობის ეშინია და ეროვნული გვარდიის შექმნა, სწორედ ამიტომ გადაწყვიტა.