მსხვერპლი 43-მდე გაიზარდა - თურქეთის შს მინისტრი ტერაქტში ISIS-ის მონაწილეობაზე საუბრობს

მსოფლიო - 18:19, 30 Jun, 2016

1890

ათათურქის აეროპორტში მომხდარი ტერაქტის მსხვერპლთა რაოდენობა 43-მდე გაიზარდა, ამის შესახებ განცხადება Hurriyet daily news-თან თურქეთის შს მინისტრმა ეფქან ალამ გააკეთა. მისი თქმით 43 დაღუპულიდან 19 სხვა ქვეყნის მოქალაქეა. მინისტრის თქმით იდენტიფიცირებულია ერთი თვითმკვლელი ტერორისტი. ეფქან ალას განცხადებით, არსებობს მტკიცებულებები, რომელიც ტერაქტში ISIS-ის მონაწილეობას ადასტურებს.

28 ივნისს, 22 საათსა და 15 წუთზე, ათათურქის აეროპორტში ორმა თვითმკვლელმა ტერორისტმა თავი აიფეთქა . ერთი ტერორისტი სამართალდამცავებმა მოკლეს.
ერთი აფეთქება საერთაშორისო ტერმინალთან მოხდა, სადაც ტაქსებს მგზავრები შეჰყავთ. ტერორისტმა სავარაუდოდ "კალაშნიკოვის" ტიპის იარაღიდან ცეცხლი გახსნა, შემდეგ კი თავი აიფეთქა. ტერორისტის მიერ ცეცხლის გახსნას, პოლიციის მხრიდან საპასუხო სროლა მოჰყვა. მეორე აფეთქება ადგილობრივ ტერმინალთან მოხდა. აფეთქების მომენტი სათვალთვალო კამერამ დააფიქსირა.დაშავებულები საავადმყოფოებში ტაქსების მძღოლებმა და სასწრაფოს ეკიპაჟებმა გადაიყვანეს.

აფეთქებაზე პასუხისმგებლობა ჯერჯერობით არცერთ დაჯგუფებას არ აუღია. თუმცა, თურქეთის პრემიერის თქმით, ტერაქტის უკან დიდი ვარაუდით "ისლამური სახელმწიფო" დგას.

ამასთან, თურქეთის ხელისუფლების ინფორმაციით, აეროპორტზე თავდასხმაში მონაწილე თვითმკვლელები რუსეთის, უზბეკეთისა და ყირგიზეთის მოქალაქეები იყვნენ. თურქული მედიის ინფორმაციით, რუსეთის მოქალაქე წარმოშობით ჩრდილოკავკასიელია, თუმცა ოფიციალურად აღნიშნულ ცნობა არ დადასტურებულა.

სტამბოლსა და იზმირში ჩატარებული სპეცოპერაციების დროს პოლიციამ აეროპორტში მომხდარ ტერაქტთან კავშირში ეჭვმიტანილი 13 ადამიანი დააკავა. თურქული მედიის ცნობით, დაკავებულებს შორის რამდენიმე უცხოელია.