თურქეთში 29 ივნისი გლოვის დღეს გამოცხადდა. სახელმწიფო დაწესებულებებზე დაშვებულია დროშები.

ბოლო ინფორმაციით, ათათურქის აეროპორტში მომხდარი ტერაქტის შედეგად დაღუპულია 41 და დაშავებულია 239 ადამიანი.

დაღუპულთა შორის თურქეთის 23 მოქალაქე და 13 უცხოელია.

მსხვერპლთა შორის არიან საუდის არაბეთის ხუთი და ერაყის ორი მოქალაქე, ასევე დაიღუპნენ უკრაინის, ირანის, ჩინეთის, იორდანიის, ტუნისის და უზბეკეთის მოქალაქეები.

წუხელ, 28 ივნისს, 22 საათსა და 15 წუთზე, ათათურქის აეროპორტში ორმა თვითმკვლელმა ტერორისტმა თავი აიფეთქა . ერთი ტერორისტი სამართალდამცავებმა მოკლეს.
ერთი აფეთქება საერთაშორისო ტერმინალთან მოხდა, სადაც ტაქსებს მგზავრები შეჰყავთ. ტერორისტმა სავარაუდოდ "კალაშნიკოვის" ტიპის იარაღიდან ცეცხლი გახსნა, შემდეგ კი თავი აიფეთქა. ტერორისტის მიერ ცეცხლის გახსნას, პოლიციის მხრიდან საპასუხო სროლა მოჰყვა. მეორე აფეთქება ადგილობრივ ტერმინალთან მოხდა. აფეთქების მომენტი სათვალთვალო კამერამ დააფიქსირა.დაშავებულები საავადმყოფოებში ტაქსების მძღოლებმა და სასწრაფოს ეკიპაჟებმა გადაიყვანეს.

აფეთქებაზე პასუხისმგებლობა ჯერჯერობით არცერთ დაჯგუფებას არ აუღია. თუმცა, თურქეთის პრემიერის თქმით, ტერაქტის უკან დიდი ვარაუდით "ისლამური სახელმწიფო" დგას.

აფეთქებასთან დაკავშირებით, თურქეთში საქართველოს გენერალურ საკონსულოში მოქმედებს ცხელი ხაზი: (+90 541) 818 44 00.

თურქული მხარე ამ ეტაპზე დაღუპულთა და დაშავებულთა შორის საქართველოს მოქალაქეების არსებობას არ ადასტურებს.