"რადიკალების დახმარება ბუმერანგივითაა"- კონსტანტინე კოსაჩოვი სტამბოლის ტერაქტს ეხმიანება

მსოფლიო - 12:12, 29 Jun, 2016

1659

რუსეთის ფედერაციის საბჭოს საერთაშორისო კომიტეტის ხელმძღვანელი კონსტანტინე კოსაჩოვი სტამბოლში მომხდარ ტერაქტს სოციალურ ქსელში ეხმიანება და აღნიშნულ ფაქტს რუსეთ-თურქეთის ურთიერთობის გაუმჯობესებასთან აკავშირებს. მისი თქმით თურქეთი „გააფრთხილეს“, რომ ანტიტერორისტულ ოპერაციაში მონაწილეობა არ მიიღოს. კოსაჩოვის განცხადებით თურქეთის ტერაქტები ერთგვარი ბუმერანგია, რომელიც თურქეთს დაუბრუნდა, რადგან ის გარკვეულწილად ეხმარებოდა ზოგიერთ ტერორისტულ დაჯგუფებებს, მათ შორის ნავთობის შეძენით, მკურნალობით და წვრთნებით.

„რადიკალების დახმარება ეს ყოველთვის ბუმერანგივითაა, ამას ამერიკელებიც დაამოწმებენ, რომლებმაც თავის დროზე „აღზარდეს“ ბინ ლადენი, როგორც საბჭოთა კავშირის წინააღმდეგ გამოსაყენებელი იარაღი.“- წერს კოსაჩოვი.

„აშკარაა, რომ ტერაქტი მიმართულია თურქეთის ხელისუფლების მცდელობის წინააღმდეგ, რომელიც რუსეთთან და ისრაელთან ურთიერთობის გაუმჯობესებას იწყებს. თურქეთს „აფრთხილებენ“, რომ საერთო ანტიტერორისტულ ფრონტში მონაწილეობა არ მიიღოს, რომელიც პირველ რიგში რუსეთის ძალისხმევით იქმნება. რაც შეეხება ჩვენი ლიდერების დიალოგს - დარწმუნებული ვარ რომ ეს ტერაქტი ამ დიალოგის შესაძლებლობას უფრო დაახლოვებს. ყველაფრის მიუხედავად , ჩვენ დღეს თურქი ხალხის მიმართ სოლიდარულები ვართ“- აღნიშნავს კოსაჩოვი.