აშშ–ის ელჩმა რიჩარდ ნორლანდმა ქართულ–ამერიკული უნივერსიტეტის ახალი შენობა გახსნა

საზოგადოება - 18:14, 24 Apr, 2013

444

ქართულ–ამერიკული უნივერსიტეტის შენობა მთლიანად გაახლდა 2012 წელს "უცხოეთის კერძო საინვესტიციო კორპორაციიდან" (OPIC) მიღებული 3,5 მილიონი დოლარის სესხით.

ელჩმა ნორლანდმა აღნიშნა, რომ "საქართველოს ეკონომიკის განვითარებაში განათლებას განსაკუთრებული მნიშვნელობა ენიჭება. შეერთებული შტატები აქტიურად ეხმარება ქართულ განათლებას, მათ შორის "საერთაშორისო განვითარების სააგენტოს" (USAID), "ათასწლეულის გამოწვევის კორპორაციის", აგრეთვე "ფულბრაიტისა" და სხვა გაცვლითი პროგრამების საშუალებით.
"უცხოეთის კერძო საინვესტიციო კორპორაცია" აფინანსებს ამ კერძო უნივერსიტეტს, რათა ქართველ სტუდენტებს თანამედროვე ეკონომიკისათვის აუცილებელი უნარ–ჩვევების განვითარებაში დაეხმაროს."

"უცხოეთის კერძო საინვესტიციო კორპორაცია" აშშ–ის მთავრობის ფინანსური ინსტიტუტია, რომელიც საერთაშორისო განვითარებაზე მუშაობს. კორპორაცია თავს უყრის კერძო კაპიტალს და მას მსოფლიოს განვითარებისათვის უაღრესად მნიშვნელოვანი გამოწვევებისაკენ მიმართავს.

რადგან OPIC–ი შეერთებული შტატების კერძო სექტორთან მუშაობს, ის ეხმარება ამერიკულ ბიზნესს, გაფართოვდეს განვითარებად ბაზრებზე, რითაც ხელს უწყობს შემოსავლების ზრდას, სამუშაო ადგილების შექმნასა და ეკონომიკური აღმავლობას შეერთებულ შტატებსა და საზღვარგარეთ. OPIC–ი დასახულ მიზანს აღწევს იმით, რომ ინვესტორებს სთავაზობს ფინანსურ რესურსს, გარანტიებსა და რისკების დაზღვევას, აგრეთვე მხარს უჭერს კერძო საინვესტიციო ფონდებს.

OPIC–ი, როგორც აშშ–ის მთავრობის სააგენტო, 1971 წელს დაარსდა. ის საკუთარი სახსრებით არსებობს და არ ხარჯავს ამერიკელი გადასახადის გადამხდელთა ფულს. OPIC–ის მომსახურება ხელმისაწვდომია ახალი და მზარდი ბიზნესებისათვის მსოფლიოს 150–ზე მეტ ქვეყანაში. დღეისათვის, OPIC–ის პროექტებით ამერიკულმა ექსპორტმა 75 მილიარდი დოლარი გამოიმუშავა და შეერთებულ შტატებში 276,000–ზე მეტი სამუშაო ადგილი შეიქმნა.