EgyptAir-ის ლაინერის კატასტროფასთან დაკავშირებით, საქმე მასობრივი მკვლელობის მუხლით აღიძრა

მსოფლიო - 12:30, 28 Jun, 2016

3495

პარიზის პროკურატურამ ავიაკომპანია EgyptAir-ის კუთვნილი ლაინერის ჩამოვარდნასთან დაკავშირებით სისხლის სამართლის საქმე აღძრა.

როგორც „ბიბისი“, პროკურატურის პრესსამსახურზე დაყრდნობით იტყობინება, საქმე მასობრივი მკვლელობის მუხლით აღიძრა. გამოძიება ჯერჯერობით შავ ყუთებს სწავლობს, რომელიც პარიზში ჩაიტანეს.

ავიაკომპანია Egypt Air-ის კუთვნილი სამგზავრო Airbus A320, რომელიც ფრენას პარიზიდან ქაიროს მიმართულებით ასრულებდა , კაიროს საჰაერო სივრცესთან მოახლოებისას 19 მაისს გაუჩინარდა.

თვითმფრინავის ბორტზე 66 ადამიანი - 56 მგზავრი და ეკიპაჟის 10 წევრი იმყოფებოდა.

ორდღიანი ძებნის შემდეგ, გაუჩინარებული ლაინერის ფრაგმენტები და მგზავრთა პირადი ნივთები ხმელთაშუა ზღვაში, ქალაქ ალექსანდრიიდან ჩრდილოეთით, 290 კილომეტრში აღმოაჩინეს.

კატასტროფის შედეგად ყველა მგზავრი დაიღუპა.

ეგვიპტის სამოქალაქო ავიაციის მინისტრის შარიფ ფატჰის განცხადებით კი, ეგვიპტური ავიაკომპანიის კუთვნილი სამგზავრო ლაინერის გაუჩინარების მიზეზი ტერაქტი ან მექანიკური დაზიანება უფროა, ვიდრე ტექნიკური გაუმართაობა.

კატასტროფამდე რამდენიმე წუთით ადრე ავიალაინერის სალონში კვამლის დეტექტორი ამუშავდა. აღნიშნული ინფორმაცია საფრანგეთის საავიაციო ინციდენტების გამოძიებისა და ანალიზის ბიურომ დაადასტურა.