"ევროკავშირის წევრობასთან დაკავშირებით მეორე რეფერენდუმის გამართვა ნაკლებად სავარაუდოა"

"ევროკავშირის წევრობასთან დაკავშირებით მეორე რეფერენდუმის გამართვა ნაკლებად სავარაუდოა" - ქემერონი

მსოფლიო - 17:58, 27 Jun, 2016

3223

დიდი ბრიტანეთის პრემიერ-მინისტრის დევიდ ქემერონის განცხადებით, ევროკავშირის წევრობასთან დაკავშირებით მეორე რეფერენდუმის გამართვა ნაკლებად სავარაუდოა. ამის შესახებ, ბრიტანული გამოცემა The Independent-ის ცნობით, დევიდ ქემერონმა მთავრობის სხდომის დროს განაცხადა.

როგორც დიდი ბრიტანეთის პრემიერ-მინისტრის ოფიციალურმა წარმომადგენელმა ჟურნალისტებს განუცხადა, ქემერონმა მთავრობის წევრებს მუშაობის გაგრძელებისკენ მოუწოდა. პრემიერის თქმით, მინისტრები მის შემცვლელს “ბრექსითისთვის” მზადებაში უნდა დაეხმარონ.

ავადროულად, ბრიტანეთის პრემიერი შოტლანდიის დამოუკიდებლობის შესახებ რეფერენდუმის შესაძლო ჩატარებას გამოეხმაურა და აღნიშნა, რომ ამის აუცილებლობა არ არის, რადგან ორი წლის წინ შოტლანდიის მოსახლეობამ არჩევანი უკვე გააკეთა და გაერთიანებული სამეფოს შემადგენლობაში ყოფნა არჩია,

დიდ ბრიტანეთში ევროკავშირის წევრობის შესახებ განმეორებითი რეფერენდუმის ჩატარების მოთხოვნით პეტიციას 3,5 მილიონზე მეტმა ადამიანმა მოაწერა ხელი.

გაერთიანებულ სამეფოში რეფერენდუმი 23 ივნისს ჩატარდა. ბრექსითს” ამომრჩეველთა 51,9%-მა ქვეყნის ევროკავშირიდან გასვლას დაუჭირა მხარი, 48,1 % წინააღმდეგი იყო.

ლონდონსა და შოტლანდიაში, ასევე ჩრდილოეთ ირლანდიაში ხმა ევროკავშირში დარჩენის სასარგებლოდ მისცეს, თუმცა უელსსა და ინგლისის საგრაფოებში ევროკავშირიდან გასვლას დაუჭირეს მხარი.

შედეგების გამოცხადებისთანავე ცნობილი გახდა, რომ დიდი ბრიტანეთის პრემიერ-მინისტრი დევიდ ქემერონი ოქტომბრამდე თანამდებობას დატოვებს. მისი თქმით, არასწორი იქნება, დარჩეს “გემის კაპიტნად” მაშინ, როდესაც დიდი ბრიტანეთის მოსახლეობამ სხვა გზა აირჩია.