შოტლანდია „ევროკავშირში ადგილის შენარჩუნების საკითხზე“ ბრიუსელთან მოლაპარაკებებს იწყებს

მსოფლიო - 18:18, 25 Jun, 2016

2950

შოტლანდია „ევროკავშირში თავისი ადგილის შენარჩუნების საკითხზე“ ბრიუსელთან საგანგებო მოლაპარაკებებს იწყებს. "ბიბისის" ცნობით, ამის შესახებ შოტლანდიის მთავრობის მეთაურმა ნიკოლა სტერჯენმა განაცხადა.
მისივე თქმით, შოტლანდიის მინისტრთა კაბინეტი იწყებს მუშაობას საკანონმდებლო პროცედურებზე, რომელიც საშუალებას მისცემს შოტლანდიას, დიდი ბრიტანეთისგან დამოუკიდებლობის საკითხზე ახალი რეფერენდუმი ჩაატაროს.

ბრიტანეთისგან დამოუკიდებლობის შესახებ რეფერენდუმის ჩატარება სტერჯენმა გუშინვე დააანონსა. მისი თქმით, შოტლანდია საკუთარ თავს მხოლოდ ევროკავშირში ხედავს.

გაერთიანებულ სამეფოში რეფერენდუმი 23 ივნისს ჩატარდა. ბრექსითს” ამომრჩეველთა 51,9%-მა ქვეყნის ევროკავშირიდან გასვლას დაუჭირა მხარი, 48,1 % წინააღმდეგი იყო.

ლონდონსა და შოტლანდიაში, ასევე ჩრდილოეთ ირლანდიაში ხმა ევროკავშირში დარჩენის სასარგებლოდ მისცეს, თუმცა უელსსა და ინგლისის საგრაფოებში ევროკავშირიდან გასვლას დაუჭირეს მხარი.

გუშინვე ცნობილი გახდა, რომ დიდი ბრიტანეთის პრემიერ-მინისტრი დევიდ ქემერონი ოქტომბრამდე თანამდებობას დატოვებს. მისი თქმით, არასწორი იქნება, დარჩეს “გემის კაპიტნად” მაშინ, როდესაც დიდი ბრიტანეთის მოსახლეობამ სხვა გზა აირჩია.