აშშ დიდი ბრიტანეთის მოსახლეობის არჩევანს პატივს სცემს

აშშ დიდი ბრიტანეთის მოსახლეობის არჩევანს პატივს სცემს - ბარაკ ობამა

მსოფლიო - 11:24, 25 Jun, 2016

2119

აშშ-ის პრეზიდენტის ბარაკ ობამას განცხადებით, დიდი ბრიტანეთის რეფერენდუმის შედეგები ამერიკისა და გაერთიანებული სამეფოს ურთიერთობებს არ დააზარალებს. მისი თქმით, ის პატივს სცემს ბრიტანელების გადაწყვეტილებას ევროკავშირის დატოვების შესახებ.

“დიდი ბრიტანეთის მოსახლეობამ საკუთარი ნება გამოხატა და ჩვენ ამ გადაწყვეტილებას პატივს ვცემთ. გაერთიანებული სამეფო და ევროკავშირი აშშ-ის შეუცვლელ პარტნიორებად დარჩებიან იმის მიუხედავად, რომ ისინი ერთმანეთთან ურთიერთობების გადახედვას იწყებენ” - ნათქვამია თეთრი სახლის ვებგვერდზე გამოქვეყნებულ განცხადებაში.

რეფერენდუმამდე ბარაკ ობამა დიდი ბრიტანეთის ევროკავშირში დარჩენას აქტიურად უჭერდა მხარს. აპრილში, ბრიტანულ გამოცემა Daily Telegraph-ში ბარაკ ობამას წერილიც გამოქვეყნდა, რომელშიც ის ქვეყნის ევროკავშირში დარჩენის უპირატესობებზე საუბრობდა.

დიდ ბრიტანეთში ჩატარებული რეფერენდუმის შედეგების გამო მწუხარება გამოთქვა ვიცეპრეზიდენტმა ჯოზეფ ბაიდენმა.

23 ივნისს ჩატარებული რეფერენდუმის თანახმად, ე.წ. “ბრექსითს”ამომრჩეველთა 51,9%-მა ქვეყნის ევროკავშირიდან გასვლას დაუჭირა მხარი , 48,1% წინააღმდეგი იყო. მოსახლეობის აქტივობამ კი 71,8 პროცენტი შეადგინა.

რეფერენდუმის შედეგემის გამოცხადებისთანავე, დიდი ბრიტანეთის პრემიერ-მინისტრმა დევიდ ქემერონმა თანამდებობა დატოვების შესახებ განაცხადა.