ინგლისის ბანკი მზად არის, საფინანსო ბაზრების მხარდასაჭერად 250 მილიარდი ფუნტი გამოყოს

მსოფლიო - 14:45, 24 Jun, 2016

3799

ინგლისის ბანკი მზად არის, რეფერენდუმის შემდეგ საფინანსო ბაზრების მხარდასაჭერად 250 მილიარდი ფუნტი გამოყოს. ამის შესახებ ბანკის ხელმძღვანელმა მარკ კარნიმ განაცხადა. მისი თქმით, მარეგულირებელი კომოსია უახლოეს კვირებში მიიღებს გადაწყვეტილებას თავისი პოლიტიკის შესაძლო ცვლილებები შესახებ.

კარნიმ ასევე განაცხადა, რომ ბრიტანული ბანკები ამჟამად ბევრად უკეთეს ფორმაშია არიან, ვიდრე 2008 წლის კრიზისამდე იყვნენ.

დიდ ბრიტანეთში ჩატარებული ისტორიული რეფერენდუმის შედეგების მიხედვით, ევროკავშირის დატოვების მომხრეებმა გაიმარჯვეს. ე.წ. “ბრექსითს” ამომრჩეველთა 51,9%-მა ქვეყნის ევროკავშირიდან გასვლას დაუჭირა მხარი, 48,1 % წინააღმდეგი იყო.

წინასწარი შედეგების გამოცხადებისთანავე, ბრიტანული ფუნტის კურსი დოლართან მიმართებაში, 1985 წლის შემდეგ ყველაზე დაბალ ნიშნულზე დაეცა. ევრო კი დოლართან მიმართებაში დაახლოებით 3 %ით გაუფასურდა.

რეფერენდუმის შედეგი აზიურ საფონდო ბირჟებზეც და მსოფლიო ბაზარზე ნავთობის ფასებზეც აისახა. 1 ბარელი Brent-ის მარკის ნავთობის ფასი ექვსი პროცენტით დაეცა.

ცოტა ხნის წინ კი ცნობილი გახდა , რომ დიდი ბრიტანეთის პრემიერ-მინისტრი დევიდ ქემერონი ოქტომბრამდე თანამდებობას დატოვებს. მისი თქმით, არასწორი იქნება, დარჩეს “გემის კაპიტნად” მაშინ, როდესაც დიდი ბრიტანეთის მოსახლეობამ სხვა გზა აირჩია.

დიდი ბრიტანეთის პრემიერი ევროკავშირიდან გასვლის წინააღმდეგი იყო.

ეკონომისტთა ნაწილის მტკიცებით, ეროკავშირიდან ბრიტანეთის გასვლა ქვეყნის ეკონომიკას სერიოზულად დააზარალებს, რაც ინვესტიციების შემცირებით შეიძლება იქნეს განპირობებული.