დღეს ჩატარებულ კონფერენციას „საქართველოს ეკონომიკა და ბიზნესგარემო“, საქართველოს ბიზნეს-ასოციაციის პრეზიდენტმა გიორგი ჭირაქაძემ ღირებული შეხვედრა უწოდა.

ჭირაქაძის განცხადებით , დღევანდელ შეხვედრაზე ექსპერტების, ბიზნესისა და ხელისუფლების წარმომადგენლებისგან სრულებით განსხვავებული მოსაზრებები გაჟღერდა:

„ჩვენ დავინახეთ, რომ არის ბევრი საკითხი, რომელზეც ვთანხმდებით და გვაქვს საერთო მოსაზრებები, თუმცა არის ისეთებიც, სადაც ჩვენგან განსხვავებული მოსაზრებებია. მთავარია, ჩვენ ყველას გვაქვს სურვილი, რომ ჩვენს ქვეყანაში ბიზნესი და ეკონომიკა გაიზარდოს. ამაზე ჩვენ დიდი აქცენტი გავაკეთეთ, როგორც ბიზნესასოციაციამ.

ჩემი აზრით, ღირებული შეხვედრა იყო. ასეთი კონფერენციები აუცილებელია. ჩვენ შევძელით, რომ ბევრ პრობლემატურ, მნიშვნელოვან, განსხვავებულ თემაზე გვესაუბრა, გაგვეგო მოსაზრებები.

ჩვენი ბიზნესასოციაციის ჩართულობა აბსოლუტურად არ უკავშირდება რაიმე პოლიტიკურ თემას. ჩვენ ყოველთვის ვიყავით აპოლიტიკურები, თუმცა გვესმის, რომ არჩევნებმა, პოლიტიკამ ჩვენი ქვეყანა არ უნდა გადაიყოლოს. მნიშვნელოვანია ჩვენი ქვეყნის ეკონომიკის განვითარება, რომ ყველანი ამაზე ვიყოთ ორიენტირებულები იმის მიუხედავად, არის არჩევნები თუ არა“, -განაცხადა გიორგი ჭირაქაძემ.