სუბარი: პატიმრებს სტეიკს ვერ ვუწვავთ, მაგრამ ხორცი და ხილი აქვთ

საზოგადოება - 17:44, 23 Apr, 2013

583

მისი თქმით, საპატიმროებში პირობები წინანადელთან შედარებით გამოსწორებულია.

,,სასჯელაღსრულების სისტემაში რაც ხდებოდა, ნათელი დადასტურებაა იმისა, როგორ "დაამარცხა" სააკაშვილმა კორუფცია. აქ იყო როგორც სისტემური, ისე ქვედა დონის კორუფცია.სისტემური კორუფციის მხოლოდ ერთ მაგალითს გეტყვით. სააკაშვილის ხელისუფლების დროს თვეში 90 ლარი იყო პატიმრის კვებაზე გამოყოფილი და არ მინახავს პატიმარი, რომელიც იტყვის, რომ ამ საჭმელს ჭამდა. ეს საჭმელი მთლიანად ე. წ. "პამოიში" მიდიოდა. დღეს, როდესაც კვება 5-ჯერ გაუმჯობესდა, პატიმრის კვება იგივე ჯდება. მიუხედავად იმისა, რომ კვების თანხა 120 ლარამდე გავზარდეთ, კომპანიამ, რომელმაც ტენდერში გაიმარჯვა, დაადო ფასი, რომელიც 90 ლარზე ნაკლებიცაა. უწინ არ იყო და ახლა არის რძის პროდუქტები. კვირაში თუ ერთხელ იყო ხორცი, ახლა კვირაში ორჯერ არის ქათმის მოზრდილი ნაჭერი, სამჯერ საქონლის ხორცი და ორჯერ თევზის ფილე. პატიმრები კვირაში 1 კგ ხილს იღებენ. სტეიკს ვერ ვუწვავთ, მაგრამ ნორმალური კვებაა და რაც მთავარია, სახელმწიფოს ეს იგივე ფასი უჯდება,"- განაცხადა სუბარმა.

მინისტრი ამბობს, რომ მაქსიმალურად შეუწყობს ხელს ღია რეჟიმის დაწესებულებების გახსნას, ასევე პატიმრების გარკვეულ ნაწილს დასვენების დღეების ოჯახში გატარების საშუალება ექნებათ.

"ამ სისტემის დალაგებას დრო სჭირდება. ასევე საჭიროა მკაცრი რეჟიმის ციხეები, სადაც რეჟიმის დამრღვევი პატიმრები განთავსდებიან. მკაცრი რეჟიმის დაწესებულება გაისად ლაითურში გაიხსნება. ეს ციხე 4300 კაცზე შენდებოდა, მაგრამ ამხელა ციხის საჭიროება აღარ არის და ის 1600 პატიმარზე აშენდება.

ამავე დროს რეჟიმი შემსუბუქდება იმ პატიმრებისთვის, რომლებიც მოტივირებული არიან რესოციალიზაციისა და საზოგადოებაში დაბრუნებისთვის. მაისში ან ივნისში გლდანში გაიხსნება ღია რეჟიმის დაწესებულება 100 კაცზე, სადაც ასეთ პატიმრებს გადავიყვანთ. ამ დაწესებულებაში ოთახები არ იკეტება და ეზოში სეირნობა თავისუფლად შეიძლება. დაწესებულების ეზოში არის აუზი, ფრენბურთის და კალათბურთის მოედნები, სახელოსნოები. ვაპირებთ სათბურების გაკეთებასაც. პატიმრებს შაბათ-კვირის შინ გატარების უფლება ექნებათ და კვირა საღამოს დაბრუნდებიან,"- ამბობს სოზარ სუბარი ,,კვირის პალიტრასთან" ინტერვიუში.