რუსეთის სახელისუფლო პარტიის ერთერთი ცნობილი პარლამენტარის ევგენი ფიოდოროვის განცხადებით, რუსეთის მიზანია „დიადი რუსეთის“ აღდგენა 1945 წლის საზღვრებში.

„ყოფილი საბჭოთა კავშირის ტერიტორიული მთლიანობა 1991 წელს უკანონოდ იქნა დარღვეული. არის კი ადამაინი, რომელსაც რუსეთში ეს არ ესმის?“ - განაცხადა დუმის დეპუტატმა ჟურნალისტთან ინტერვიუში.

მან უკრაინაში შეჭრა, ყირიმის ანექსია და აღმოსავლეთ უკრაინის ტერიტორიაზე რუსეთის არმიის მოქმედებები დაახასიათა როგორც „ამ საკითხის გადაწყვეტის ისტორიული ტექნოლოგია“.

„საბჭოთა კავშირის ტერიტორია - საერთაშორისო სამართლის მიხედვით, ეს ჩვენი სამშობლოს - რუსეთის ტერიტორიაა. ამ საზღვრების აღდგენა აუცილებელია და ჩვენ ეს უნდა გავაკეთოთ,“ - აღნიშნავს დეპუტატი.

მისი აზრით NATO-სთან ომი არასწორი იქნებოდა, მაგრამ ისტორიული საზღვრების აღდგენა აუცილებელია, სანქციებისა და რუსი ხალხის სოციალური მდგომარეობის გაუარესების მიუხედავად. მან მოსახლეობას მოუწოდა მოითმინოს დღევანდელი კრიზისი, რადგან ომი და აგრესია რუსეთის გაერთიანებისა და აღდგენის ერთადერთი საშუალებაა.

„ჩვენ უნდა გვქონდეს ის, რის გამოც აუცილებელია ვითმინოთ. და რა არის ეს ფაქტორი - რუსული სახელმწიფოს ისტორიულ საზღვრებში აღდგენა. ესაა ჩვენი მიზანი, რომელიც რუსებს 1500 წლის განმავლობაში აერთიანებდა, მთელ მოსახლეობას, რუსეთში მცხოვრებ ყველა ნაციას,“ - აცხადებს ფიოდოროვი.

ამ ველიკოდერჟავული გამონათქვამების შემდეგ ფიოდოროვმა განმარტა, რომ ეს არ არის დამპყრობლური იდეები, არამედ სახელმწიფოს აღდგენის იდეაა.

შეგახსენებთ, რომ ევგენი ფიოდოროვი რუსეთის სახელმწიფო დუმის 4 მოწვევის დეპუტატია „ედიანია როსიას“ სიით.