სანკტ-პეტერბურგის ეკონომიკურ ფორუმზე რუსეთის პრეზიდენტი ვლადიმერ პუტინი შეიარაღების საკითხსაც შეეხო.

"ჩვენ დაახლოებით ვიცით, რომელ წელს მიიღებს აშშ-ს შეიარაღება ახალ რაკეტას, რომლის მოქმედების რადიუსიც უკვე გაცილებით დიდი იქნება, ვიდრე 500 კილომეტრია. იმ მომენტიდან ის ჩვენს ბირთვულ პოტენციალს საფრთხეს შეუქმნის. ჩვენ ეს ვიცით, წლების სიზუსტით ვიცით, ხოლო ამერიკელებმა იციან, რომ ჩვენ ეს ვიცით," - განაცხადა რუსეთის პრეზიდენტმა.

რუსეთის პრეზიდენტი, სავარაუდოდ, ახალ ამერიკულ რაკეტსაწინააღმდეგო იარაღს SM-3 Block IIA-ს გულისხმობდა, რომელსაც შეეძლება საკონტინენტთაშორისო ბალისტიკური რაკეტების 500 კილომეტრზე მეტ მანძილზე ჩამოგდება. იგი უკვე პირველ გამოცდას გადის და ამერიკელი სამხედროების გათვლით, 2020 წლისთვის შევა შეიარაღებაში.

ამასთან, ამერიკელი სამხედრო მეცნიერები და ინჟინრები ამ რაკეტის უფრო მძლავრ ვერსიაზე - SM-3 - Block IIB-ზე მუშაობენ. მისი მონაცემები უცნობია, თუმცა, მისი მთავარი მახასიათბელი შორ მანძილთან ერთად, მოქმედების სიზუსტეა.

აღსანიშნავია, რომ 2013 წლისთვის რუსმა დიპლომატებმა შესძლეს ამ ორი პროექტის შეჩერება - აშშ-ს თავდაცვის სამინისტრომ გაავრცელა განცხადება, რომ ქვეყანა ევროპის რაკეტსაწინააღმდეგო თავდაცვის პროგრამას აჩერებს და აშშ-მ მთელი ყურადღება დასავლეთ სანაპიროს დაცვის გაძლიერებაზე გადაიტანა. მაგრამ უკრაინის მოვლენებისა და რუსეთის აგრესიული პოლიტიკის შედეგად რაკეტებზე მუშაობა განახლდა და ისინი უკვე დასკვნით ფაზაშია შესული.