ბელგია საფრანგეთს ბრიუსელისა და პარიზის ტერაქტებში ეჭვმიტანილ მუჰამედ აბრინის გადასცემს

მსოფლიო - 16:41, 10 Jun, 2016

2182

ბელგია მზად არის პარიზისა და ბრიუსელის ტერაქტების ორგანიზებაში მთავარი ეჭვმიტანილის მუჰამედ აბრინი საფრანგეთს გადასცეს. ამის შესახებ გადაწყვეტილება ბელგიის სასამართლომ მიიღო.სასამართლოს გადაწყვეტილების თანახმად, ბელგია საფრანგეთს ასევე გადასცემს მუჰამედ ბაკალის, რომელიც ასევე 13 ნოემბრის პარიზის ტერაქტების ორგანიზებაში არის ეჭვმიტანილი.
პარიზისა და ბრიუსელის ტერაქტების ორგანიზებაში მთავარი ეჭვმიტანილი აბრინი აპრილში დააკავეს. ის ზავენტემის აეროპორტის სათვალთვალო კამერებმა თვითმკვლელ ტერორისტებთან ერთად დააფიქსირა.შეგახსენებთ, ე.წ „ისლამური სახელმწიფოს’" ტერორისტებმა ბელგიის დედაქალაქში 22 მარტს ტერაქტები განახორციელეს. აფეთქებების შედეგად 32 ადამიანი დაიღუპა, 300-ზე მეტი კი დაშავდა. 2015 წლის 13 ნოემბერს, პარიზში განხორციელებულ ტერაქტებს კი 128 ადამიანი ემსხვერპლა, დაშავდა 200-მდე ადამიანი.

გამომძებლებმა მოგვიანებით, აბრინის კომპიუტერში წერილი აღმოაჩინეს. წერილში აღნიშნულია, რომ აბრინი მიესალმება გასული წლის ნოემბერში პარიზში განხორციელებულ თავდასხმებს და სურს , ანალოგიური, მოწამეობრივი სიკვდილით აღესრულოს. როგორც გამომძიებლები ამბობენ, ეჭვმიტანილს კომპიუტერიდან აღნიშნული წერილის წაშლა სცადა, თუმცა გამომძიებლებმა მისი აღდგენა შეძლეს. აღსანიშნავია, რომ მუჰამედ აბრინი ბრიუსელის ტერაქტებში ეჭვმიტანილებს შორის ერთადერთია, ვინც ცოცხალი გადარჩა.
გამომძიებლების ცნობით, იგი პარიზში გასულ წელს მომხდარი ტერატის განხორციელებაშიც მონაწილეობდა.