სკანდალი გერმანიასა და რუსეთს შორის - გამოიყენა თუ არა გერმანიამ რუსეთთან დაკავშირებით სიტყვა "მტერი"

მსოფლიო - 16:55, 07 Jun, 2016

9406

გერმანიის თავდაცვის უწყება უარყოფს მედიაში გავრცელებულ ინფორმაციას იმის შესახებ, რომ გერმანიის სამხედრო დოქტრინაში რუსეთი, როგორც მოწინააღმდეგე მხარე ისე არის მოხსენიებული. ურსულა ფონ დერ ლიაიენის განცხადებით რუსეთთან დაკავშირებით შესაძლებელია გამოყენებული იქნეს სიტყვა, როგორიცაა „გამოწვევა“ და არა როგორც „მოწინააღმდეგე“. ამასთანავე არსებული ტერმინის რუსეთთან მიმართებაში გამოყენებას უარყოფს რუსეთში გერმანიის ელჩი რიუდიგერ ფონ ფრიჩიც, მისი თქმით „თეთრი წიგნის“ ახალი რედაქცია, რომელიც გერმანიის ეროვნული უსაფრთხოების სახელმძღვანელოს წარმოადგენს, ჯერ არ გამოქვეყნებულა და აღნიშნულ ტერმინოლოგიასთან დაკავშირებით ინფორმაციები სპეკულაციაა.

გერმანულმა გამოცემა Die Welt-მა სახელისუფლებო წრეებთან დაახლოებულ წყაროზე დაყრდნობით დაწერა, რომ გერმანიის სამხედრო დოქტრინის ახალ რედაქციაში რუსეთი , როგორც მოწინააღმდეგე ისეა მოხსენიებული და ის ასევე შეყვანილია გლობალური საფრთხეების ათეულში.

გერმანული მედიის გავრცელებულ ინფორმაციაზე კომენტარი რუსეთის საგარეო უწყების ხელმძღვანელმა სერგეი ლავროვმაც გააკეთა . მან იმედი გამოთქვა, რომ გერმანიის მთავრობა ყველა დადებით და უარყოფით მხარეს გააანალიზებს, ვიდრე რუსეთს მოწინააღმდეგეთა რიგებში ჩარიცხავს. რუსეთის პრეზიდენტის პრესმდივნის დმიტრი პესკოვმა კი თავის მხრივ განაცხადა, რომ თუ გერმანიის მხრიდან რუსეთის მოწინააღმდეგეთა ნუსხაში შეყვანა დადასტურდება ეს სამწუხარო და შემაშფოთებელი ფაქტი იქნება.