გერმანიის წამყვანი პოლიტიკური ძალები საქართველოსთან უვიზო რეჟიმის წინააღმდეგ გამოდიან

მსოფლიო - 17:52, 06 Jun, 2016

7602

გერმანიის წამყვანი პოლიტიკური ძალები, "ქრისტიან-დემოკრატიული კავშირისა" და "ქრისტიან-სოციალური კავშირის" ბლოკის წარმომადგენლები საქართველოსთვის სავიზო რეჟიმის გაუქმების წინააღმდეგ გამოდიან. ამის შესახებ გერმანული გამოცემა Bild-ი წერს. გამოცემის თანახმად, კონსერვატიული ბლოკის წევრები მიიჩნევენ, რომ საქართველოსთვის უვიზო რეჟიმის მინიჭება ორგანიზებული დანაშაულის ზრდას გამოიწვევს.

გამოცემასთან საუბარში ბუნდესტაგის დეპუტატი არმინ შუსტერი აცხადებს, რომ თავშესაფრის მაძიებლები საქართველოდან, გერმანიაში ორგანიზებულ დანაშაულში სხვა უცხოელებზე მეტად არიან ჩართული.
მისი თქმით, ქართული კრიმინალური დაჯგუფებები გახდა წამყვანი ძალა, რომელიც გერმანიაში ბინების ძარცვით არის დაკავებული. კონსერვატორი პოლიტიკოსი დარწმუნებულია, რომ უვიზო რეჟიმის ამოქმედება მხოლოდ წაახალისებს დანაშაულის ამ სახეობას.

აღნიშნულ მოსაზრებას იზიარებს, "ქრისტიან-სოციალური კავშირის" დეპუტატი და საგარეო საკითხებში ექსპერტი ჰანს-პეტერ ული. ამასთან, გერმანელი პოლიტიკოსი მიიჩნევს, რომ საქართველოს ნატო-ში მიღება “რუსეთთან კონფლიქტს გაამწვავებს”.

როგორც გამოცემა იტყობინება, გერმანიის სისხლის სამართლის საქმეების ფედერალური უწყების ოფიციალური მონაცემებით, გასულ წელს გერმანიაში ბინის ძარცვის 167 000 ფაქტი განხორციელდა, აქედან უმრავლესობა სწორედ ქართულმა მაფიამ ჩაიდინა.