8 მიგრანტი ბავშვის გაუპატიურებაში ბრალდებულს 108-წლიანი პატიმრობა მიუსაჯეს

მსოფლიო - 12:30, 04 Jun, 2016

4577

თურქეთში, მიგრანტი ბავშვების გაუპატიურებაში ბრალდებულ მამაკაცს 108 წლით თავისუფლების აღკვეთა მიუსაჯეს. ინფორმაციას ამის შესახებ სააგენტო Reuters-ი ავრცელებს. გამოძიების ცნობით, ქალაქ გაზიანტეპის მიგრანტების თავშესაფრის თანამშრომელი რვა სირიელ ბიჭზე სისტემატიურად ძალადობდა.

როგორც მაისის დასაწყისში გახდა ცნობილი, გაზიანტეპის პროვინციის ნიზიპის ბანაკში ძალადობის მსხვერპლი 8-დან 12 წლამდე ასაკის ბიჭები გახდნენ.

გამოცემის ინფორმაციით, საუბარია იმ ბანაკზე, რომელიც 23 აპრილს გერმანიის კანცლერმა ანგელა მერკელმა და ქვეყნის პრეზიდენტმა რეჯებ ტაიპ ერდოღანმა მოინახულეს.

სექსუალურ ძალადობაში ეჭვმიტანილი ბანაკში დამლაგებლად მუშაობდა. ის 2015 წლის სექტემბერში დააკავეს.

გამოძიების ინფორაციით, მამაკაცი სამი თვის განმავლობაში ახორციელებდა სექსუალურ ძალადობას ბავშვების მიმართ, სანაცვლოდ კი მათ 0,5-1.5 დოლარს სთავაზობდა.

გაუპატიურების ფაქტები მას შემდეგ გამოაშკარავდა, რაც 8 ოჯახმა ამასთან დაკავშირებით საჩივარი შეიტანა. გამოცემის თანახმად, ბავშვების რიცხვი გაცილებით მეტია, თუმცა მათი ოჯახები სარჩელის შეტანისგან თავს იკავებენ , რადგან ლტოლვილის სტატუსის დაკარგვის ეშინიათ.

თურქეთის სამხრეთ ნაწილში მდებარე ბანაკში 14 ათასი მიგრანტი ცხოვრობს.