აპრილში ქვეყნის ეკონომიკურმა ზრდამ 4,3% შეადგინა- ეკონომიკის მინისტრი

ბიზნესი & ეკონომიკა - 14:41, 31 May, 2016

1457

ეკონომიკისა და მდგრადი განვითარების მინისტრმა, ვიცე-პრემიერმა დიმიტრი ქუმსიშვილმა დღეს გამართულ ბრიფინგზე საქართველოს ეკონომიკის მაჩვენებლებზე ისაუბრა და აღნიშნა, რომ მიმდინარე წლის აპრილში ქვეყნის ეკონომიკურმა ზრდამ 4,3% შეადგინა. ამასთანავე ქუმსიშვილის განცხადებით, ქვეყანაში მნიშვნლოვნად გაუმჯობესდა მაკროეკონომიკური ინდიკატორები, რაც ინვესტიციების ზრდამ გამოიწვია.

“მიმდინარე წლის აპრილში ქვეყნის ეკონომიკურმა ზრდამ 4,3% შეადგინა. ამით გაგრძელდა ის პოზიტიური დინამიკა, რომელიც მიმდინარე წლის თებერვალ-მარტიდან დაიწყო. მნიშვნელოვნად გაუმჯობესდა მაკროეკონომიკური ინდიკატორები. აღნიშნულ ზრდაში მნიშვნელოვანი წილი შეიტანა შიდა მოთხოვნის გაუმჯობესებამ, კერძოდ ინვესტიციების ზრდამ, რაც განაპირობა ფისკალურმა სტიმულებმა და ინვესტორთა განწყობის გაუმჯობესებამ, რაც მოლოდინების სტაბილიზაციის შედეგად მოხდა”, - განაცხადა დიმიტრი ქუმსიშვილმა.

ქუმსიშვილის თქმით, მიმდინარე წლის აპრილში, მშპ-ს მნიშვნელოვანი რეალური ზრდა დაფიქსირდა სამშენებლო მასალების წარმეობაში - 25%, სასტუმროებისა და რესტორნების სექტორში 20%, მშენებლობაში 15%, საკვები პროდუქტებისა და სასმელების წარმოებაში 10%. რაც შეეხება ინფლაციის მაჩვენებელს, ეკონომიკის მინისტრის თქმით, აპრილის თქვეში მან 3,2% შეადგინა, რაც დადებითი ტენდენციაა.

დიმიტრი ქუმსიშვილის შეფასებით, დადებითად შეიძლება შეფასდეს 12%-იანი უმუშევრობის მაჩვენებელი.